Povu konsidera bolsa estudu ne’ebé mak durante ne’e Governu implementa hodi haruka Timor-oan sir aba estuda iha rai liur ne’e, Governu halo disrkiminasaun ba povu nian oan, tanba bolsa estudu ne’e, bo’ot nia oan sira mak sempre hetan.
Estudante Bonifasio do Carmo Amaral, husi Suku Ogues, Postu Administrativu Maukatar, Munisipiu Covalima, lamenta katak, povu kbi’it laek nia oan mós, matenek hanesan bo’ot sira nia oan.
“Ha’u nia perguntas liga ba edukasaun katak, edukasaun sai hanesan matadalan ida ba ema, entaun tuir ha’u nia observasaun, durante ne’e ami covalima oan, nunka hetan bolsa estudu, bo’ot nia oan sira de’it mak sempre hetan,” relata Bonifasio do Carmo ba PR Taur Matan Ruak, liu husi dialogu komunitária ho povu iha Suku refere, Segunda (15/08).
Alende ne’e, komunidade Cecilia Gusmão mós informa katak, klínika ida iha Aldeia Delor, la uza tinan ida resin ona, bainhira komunidade atu halo tramtamentu sira tenki halai to’o iha Suku Ogues.
Alende ne’e, Elsa Amaral mós kestiona katak, tanba saida mak veteranus sira balu hetan ona sira nia direitu no balu seidauk.
Purtanto, Marselino Soares Pinto, fó hanoin ba SEPFOPE katak, nia hatene halo kadeira rotan, tanba ne’e tanba ne’e nia husu atu Governu apoia ekipamentus ba nia hodi nia bele fahe nia matenek ne’e ba maluk joven sira iha Suku refere.
Alende ne’e, Julio do Carmo informa katak, iha Munisipiu Covalima ne’e, maioria feto-mane kaben ho Indonesia oan, maibe desde uluk sira tuir teste laliu atu sai sidadaun.
“Tanba ne’e, ami husu ba Prezidenti Repúblika atu iha ita bo’ot nia mandatu tinan ida ho balu ne’e, bele rezolve netik problema ne’e, atu nune’e sira bele tuir eleisaun 2017,” informa nia.
Hatan ba preokupasaun sira ne’e, Prezidenti Repúblika (PR), Taur Matan Ruak esplika, Atu hetan bolsa estudu ne’e, imi tenki halo esforsu atu apply.
“Ita nia oan sira iha Timor laran tomak mak hadau malu ida ne’e, Ha’u uluk hatete ba ita nia maun Xanana katak, bele ka lae ita uza sistema hanesan uluk ita haruka ita nia oan sira ba Cuba,” dehan PR Taur Matan Ruak.
Problema seluk mak dalaruma maske ema balu nilai ladiak mas sira fasilita malu de’it mak ba, to’o ikus ema haruka sira mai fali.
Kona-ba estrada, PR Taur Matan Ruak dehan, iha fatin balu Governu komesa loke ona estrada.
“Estrada imi nian a’at duni, maibé imi nian kareta se bele la’o iha fatin seluk, estrasa laiha,” katak Taur Matan Ruak.
Kona-ba eskola, Xefi Estadu ne’e afirma, kondisaun eskola EBF iha Suku refere kondisaun diak uit oan, iha fatin balu, kondisaun aat liu, tanba professor sira sulan hamutuk estudantes 100 ida de’it iha sala ida.
Xefi Estadu ne’e hatutan, problema ne’e sai problema bo’ot iha Timor Leste, tanba Iha fatin fatin ne’ebé nia vizita ona, ema sempre levanta problema edukasaun nian.
Maibé, Taur Matan Ruak dehan, agora dada’uk Governu komesa halo esforsu atu hadia buat sira ne’e hotu.
Kona-ba atu sai sidadaun Timor Leste ne’e, PR Taur Matan Ruak dehan, atu sai sidadaun Timor Leste ne’e, iha nia kriteriu ne’ebé mak tenki tuir, tenki hatene lian tetun, no kultura Timor Leste.
Xefi Estadu ne’e dehan, ida ne’e la’os dehan katak, sira labele sai sidada’un Timor Leste, persija tempu.
“Prezidenti labele ajuda, tanba ida ne’e tuir lei, tanba ne’e, imi tenki hakbesik an ba Ministériu sira ne’ebé toma konta ba ida ne’e, hodi buka informasaun lolos atu la’o tuir,” katak Taur Matan Ruak.
Kona-ba problema saúde, PR Taur rekuñese katak, Governu abansa maka’as iha área saúde nian.
“Ita abansa maka’as iha saúde, tanba maske doutor sira uma laiha, hela de’it iha sede Suku no komunidade, maibé Governu konsege tau ona pesoal saúde iha Suku hotu,” relata Taur Matan Ruak.cos
Jornal Nacional
