Delegadu Ospital Referal Maliana (HRM), Vitor Soares Martins, hateten to’o agora Ospital Referal Maliana kontinua menus parteiras hodi fo atendementu ba inan isin rua no inan isin ne’ebe atu partus.
Nia dehan, munisipiu Bobonaro iha Sentru Saude hitu (7) no 23 Postus Saude, enkuantu parteiras ne’ebe iha hamutuk nain 28 deit.
“Kada postu saude no sentru saude iha deit parteiras nain 2, lolos ne’e tenke nain hat kada postu no sentru saude,” delegadu Martins informa, iha Dili.
Tanba ne’e, nia dehan, inan isin rua barak mak laiha vontade atu mai iha sentru ou postu saude hodi halo teste ba sira nia isin rua.
“Inan isin rua barak mak drop out, balun mai iha semana primeriu maibe semana tuir mai no to’o ikus la mai vizita ona, tanba antendementu ladun masimu,” nia hateten.
Nia informa, iha postu saude 10 mak to’o agora seidauk monta parteiras, entaun dala ruma infermeiru/a treinadu sira mak halo fali servisu parteiras nian iha ne’eba.
Iha fatin seluk Deputada Ana Ribeiro, rekonese no konsidera kestaun ne’e hanesan dezafiu 8ida ne’ebe mak setor saude infrenta, governu tenke buka nia solusaun.
“Inan isin rua no inan sira ne’ebe atu partus presiza duni parteiras atu ajuda sira,” Deputada Ribeiro hateten.
Nia informa, husi parte saude mos dala ruma fo treinamentu ba mediku no infermeiru jeral sira hotu halo servisus parteiras nian, tanba ne’e husu atu formasaun sira ne’e labele para.
Iha parte seluk Diretora Jeral (DJ) Ministeiru Saude (MS), Odete Maria, rekonese kestaun ne’e no sei buka dalan oinsa hodi rezolve problema hirak ne’e.
“Ita sei haree oinsa mak bele rezolve,” nia hateten.
The Dili Weekly