Responsavel ba Moras Dengue Ministerio Saude (MS), dotor Frederico Bosco, hateten hahu Janeiro to’o Marsu tinan 2016, moras dengue hamate ona ema nain rua, tanba estadu grave.
Nia dehan, hahu fulan Janeiro to’o Marsu, ministerio registu ona kazu dengue iha munisipio hotu hamutuk 152. Husi numeru ne’e munisipio Dili bo’ot liu ho kazu 118 kompara ho munisipio sira seluk.
“Munisipio Dili aas tanba distansia husi uma ida ba uma seluk besik no problema urbanizasaun fasil ba susuk atu halo transmisaun,” Dotor Bosco hateten, iha hotel Timor, Dili.
Nia hatutan, MS halo ona intervensaun iha tereinu liu –liu distribuisaun aimoruk abate ba komunidades hodi oho susuk nia tolun no halo mos fomigasaun ba fatin afetado sira hodi prevene transmisaun ba fatin seluk.
Alende ne’e, nia dehan, ekipa promosaun saude ministerio nian koopera ho administradores no autoridade local sira hodi halo sosializasaun ba komunidades kona ba moras dengue, prevensaun no nia impaktu.
Hatan ba komunidade ne’ebe lakohi loke odamatan ba ekipa atu halo fomigasaun, nia dehan, responsabilidade atuoridade local nian atu informa komunidades loke odamatan ba ekipa halo fomigasaun.
“Tenke halo hotu fomigasaun ba uma sira ho distansia metru 200 husi uma ba ida ba uma seluk, tanba susuk aedes agepthy ne’ebe kauza moras ne’e bele semo metru 200,” nia hateten.
Entretantu delegada Saude Munisipio Dili, Agustina Saldanha, hateten sira forma ona komisaun kontrolu vector ne’ebe involve direita autoridade local sira atu sensibiliza no mobilize komunidades kontrolu vector liu husi halo limpeza iha bairo.
“Ami la’o ona iha postu administrative sira atu informa ba komunidade sira kona ba lala’ok moras dengue ho nia prevensaun sira,” nia hateten.
Nia dehan, saude Dili uza meus oioin atu informa komunidade sira maibe dala ruma komunidade sira ladun tau importansia atu partisipa iha atividade sosializasaun sira ne’ebe la’o iha sira nia postu administrative.
Tuir observasuan Jornalista iha tereinu, nota katak komunidade balun lakohi loke sira nia uma bainhira ekipa saude ambiental ba halo fomigasaun, ho razaun fomigasaun halo susuk barak liu tan fali.
The Dili Weekly