Diretor Nasional Asaun Sosial Eskolar Ministerio Edukasaun (ME), Belchior R.N. Barros, hateten programa kintal (to’os) eskola agora daduan paradu, tanba kintal hetan estragus husi inundasaun.
“Iha kedas 2015 to’o mai agora paradu, tanba moru ne’ebe haleu kintal ne’e hetan estragus husi inundasaun iha fulan Novembru tinan kotuk,” Diretor Barros, hateten iha salaun enkontru Correios, Dili.
Nia dehan, programa ne’e positive tebes hodi hatudu ba labarik sira kona ba aihan lokal ne’ebe iha valor nutrisaun aas inklui fahe mos informasaun baziku ba sira kona ba nutrisaun iha Timor–Leste.
Kona ba kontinuasaun ba programa ne’e, nia dehan, diretor eskola ensino baziku Hera submete ona proposta mai iha ministerio, hodi konstrui hikas moru protesaun ba kintal ne’e.
Maibe nia dehan, seidauk iha desizaun tanba prioridade ministerio nian tinan ne’e mak rehabilitasaun ba eskola.
Nia informa, orsamentu ba programa ne’e hetan apoiu governu Thailandia liu husi reinha Thailandia bainhira vizita mai Timor –Leste iha tinan 2014.
Kona ba montante orsamentu, nia dehan, liu rai Thailandia apoiu $1 miliaun ba programa hotu ne’ebe implementa iha Timor–Leste inklui mos programa to’os eskola ne’e.
Entretantu Diretora organizasaun Hamutuk Ita Ajuda Malu (HIAM) Health, Rosaria Martins da Cruz, hateten to’os eskola importante tebes hodi esplika ba labarik sira kona ba valor nutrisaun husi aihoris sira ne’ebe kuda iha to’os.
“Hanorin ita nia oan sira atu sira bele komprende valor nutrient iha hahan bainhira sira kuda,” nia hateten.
Nia dehan, povu Timor –Leste maioria agrikultor, tanba ne’e atu tradisaun ida ne’e labele mate tenke eduka kedas labarik sira tanba povu Timor –Leste nia moris lolos ne’e mai husi agrikultura.
The Dili Weekly