Bazea ba rezultadu peskiza husi organizasaun Judicial System Monitoring Program (JSMP) iha tinan 2015, hatudu katak labarik (feto) Timor-Leste ho idade menoridade 34% mak hetan violensia seksual iha sira nia moris.
Peskizador JSMP, Rita Alves, hateten numeru ida ne’e sira identifika bainhira akompanha julgamentu iha kada loron iha tribunais municipal sira.
“Rezultadu peskiza iha 2015, hatudu katak feto 34% ho idade 14-15, iha esperiensia ba violensia seksual durante sira nia moris,” Peskizador Alves hateten, iha Dili.
Iha tinan 2012, nia hateten, total vitima ba violensia seksual hamutuk 41, iha 2013 hamutuk 57, iha 2014 hamutuk 71 no 2015 hamutuk 102 e vitima sira ne’e hetan violensia husi sira nia parseiru intimu no mos ema seluk.
Tuir artigu 172 kodigu penal, nia dehan, kazu violensia seksual ne’e hetan julgamentu barak liu kompara ho kazu krimi sira seluk.
Alende ne’e, nia dehan, JSMP nota katak sei iha feto barak mak hetan violensia seksual maibe lakohi atu denunsia, tanba dala ruma vitima hetan presaun husi familia ne’ebe promote atu resolve liu husi dalan justisa informal, e mos tanba falta konesementu ba sistema justisa formal.
Iha fatin seluk Vise Prezidente Grupu Feto Parlamentar (GFPTL), Deputada Albina Marcal, rekonese no konsidera asuntu ne’e sai hanesan problema nasional ne’ebe mak governu presiza toma atensaun.
“Presiza tebes atensaun masimu hosi orgaun tomak, pena ne’ebe mak fo ba arguido ne’e tenke adekuadu hodi sira seluk ne’ebe atu halo sente tauk,” Marcal sujere.
Nia mos, sujere ba komunidade tomak atu hasa’e konsiensia moralidade atu labele involve iha hahalok sira hanesan ne’e.
“Iha uma laran tenke iha prinsipiu moralidade, atu labele involve iha aktus sira hanesan ne’e,” nia dehan.
The Dili Weekly