DILI - Vise Prezidenti Komisaun A Parlamentu Nasionál (PN) trata asuntu Konstitusionais, Justisa, Administrasaun Públika, Poder Lokál no Anti Korupsaun, Arão Noe de Jesus, hatete, redus komisáriu CNE (Comissão Nacional das Eleições) na’in 7 sei la fó impaktu ba iha eleisaun jerál 2017.
“Impaktu laiha ida. Sira (CNE) na’in 10 resin bele eleitu fila fali. Ne’ebé, buat ne’e normál,” reprezentante povu ne’e informa ba jornalista sira iha Parlamentu Nasionál, Sesta (8/4).
Nia hatutan CNE nia funsaun agora ne’e temporáriu. Só iha konvokatóriu maka sira bele ba iha CNE hodi halo reuniaun. Laiha konvokatóriu sira ida-idak serbisu iha nia fatin.
Arão haktuir katak sé Señor José Agustinho Belo hanesan prezidenti CNE tuir loos nia funsionáriu Parlamentu, nia lor-loron tenke serbisu iha ne’e depois maka ba iha ne’ebá kuandu iha konvokatóriu ruma ba reuniaun CNE nian. La’ós loron-loron iha ne’ebá (CNE). Ida ne’e maka sala.
“Tan ne’e maka Parlamentu altera lei órgaun eleitorais ne’e para regulariza,” nia esplika.
Lei ne’e rasik, nia dehan, altera tiha ona. Hein de’it ona Prezidenti Repúblika atu promulga, basá hosi Tribunal rasik mós deklara ona kata lei ne’e laiha inkonstitusionalidade. Nia rasik mós la fiar katak membru CNE na’in 15 bele kontrola eleisaun jerál iha 2017 ne’ebé ho totál sentrál eleisaun hamutuk atus ida resin iha postu administrativu hamutuk 65.
“Uluk sira na’in 15 la kontrola ida. Sé maka dehan kontrola ha’u la fiar ida. Basá, sentru eleisaun ne’e barak. O membru de’it iha distritu ida o bele kontrola sentru eleisaun sira ne’e hotu, la’e karik. Pasiar, sim. Haree liu-haree liu bele, maibé atu hela metin para akompaña to’o hotu ne’e la’e ida,” nia konta tuir.
“Tanba ne’e maka ami nia opsaun membru CNE ne’e redus. Sira (CNE) nomeia maka delegadu momentu besik eleisaun. Delegadus ne’e maka ba halo akompañamentu eleisaun, depois nia halo relatóriu mai CNE, CNE simu relatóriu,” nia esplika tan.
Objetivu loloos redus komisáriu CNE, Arão hatán, atu sira ne’e bele efetivu para sira erbisu. “Tuir lei hatete katak atu halo de’it sira nia funsaun ba superviziona aktu eleitorál, eleisaun tinan lima dala ida. Sé sira permanente tinan lima iha ne’ebá para halo saida? Sira nia funsaun ne’e observadór, halo nusa maka sira tenke permanente iha laran. Entaun, ida ne’e gasta despeza de’it,” Arão esklarese.(jos)
Timor Post