Xefe Estadu Falintil-Forsa Defeza Timor Leste (F-FDTL), Major Jeneral Lere Anan Timor apela ba membru Polisia Militar (PM) atu nafatin hatudu disiplina ne’ebé diak hodi sai ezemplu ba instituisaun defeza nian.
Lere dehan, ho aniversariu ne’e laos ba atu komemora deit maibe oinsa maka hotu hanoin bainhira servisu nudar Polisia Militar tenki ho disiplina maka bele determina buat ne’ebe maka halao ona iha tinan ida nia laran.
“Ha’u hanoin konaba komportamentu ema indifidu ne’e importante liu, ba nia kareira no ba Militar ita nia komportamentu tenki lao tuir ba lei no disiplinar Militar nian,”Majen Lere Anan Timor deklara iha Seremonia aniversariu PM ba dala sanulu resin ida (11) ne’ebé halao iha salaun PM, Kintal Bo’ot-Dili, Domingo (17/01) horseik.
Tanba nia dehan, PM ninia disiplina hahalok no liafuan sai hanesan ejemplu ba instituisaun seluk banati tuir inklui hetan konfiansa nafatin iha komunidade nia leet.
“Tanba saida maka imi sai ejemplar. Tanba imi maka loron kalan hamutuk ho povu, komponente seluk la hanesan ho imi. Imi maka loron kalan moris hamutuk ho ita nia komunidade ida ne’e maka importante,” dehan Lere.
Nia dehan, profisionalismu la haree husi hatais ka fijiku diak, maibe haree husi hahalok military sira nian ne’ebe hatudu durante ne’e iha balu ke hatudu komportamentu diak, maibe iha balu la hatudu ninia komportamentu diak.
“Ha’u hanoin katak iha tinan ida nia laran PM la’os halo buat hotu-hotu di’ak no buat hotu-hotu a’at, maibe diak mós imi halo no a’at mós imi halo,”deklara Majen Lere.
Nune’e mos iha oportunidade ne’e Majen Lere husu ba membru PM atu nafatin hatudu profesionalidade seguransa liu-liu wainhira akompanha bainaka espesial husi rai Liur mai Timor Leste.
“Porezemplu aban bainrua iha loron 25 Prezidente Republika Indonesia Joko Widodo mai tenke halo seguransa ho professional, tamba ne’e alta identidade nasaun ida nian,”afirma Lere.
Lere husu PM hatudu komportamentu profesionalismu ne’ebe diak husi kondutór, Seguransa no Batedor sira, tamba ida ne’e mak save importante ba susesu seguransa nian.
Iha sorin seluk Komandante Unidade PM, Majór Norberto Maria Carlos afirma, PM hahu hó numeru ida ne’ebé ki’ik no dadaun numeru aumenta ba bo’ot, e servisu mós kontinua aumenta ba bei-beik.
Espelika Komandante Unidade PM ne’e hakturi katak, PM nia servisu atu asegura orden defeza nian rua mak kombate iha area rural no mós kombate iha area urbana.
Ne’ebe iha area rural halo seguransa reta guarda e transporta prizioneru de gerra sira no iha area urbana mak hanesan kontrolu trafiku ba komboiu militar sira hotu no kontrolu tranzitu e kontrolu desturbius iha sidade laran ne’ebé karik iha orden husi defeza.
Alende ne’e PM mós iha kapasitasaun ba rekursu umanus iha rai liur no rai laran ba iha areas importante militar nian.
Maibe Iha difikuldade PM nian atu ezekuta Orden mak konaba viaturas motorizadas no ekipamentus koletiva pessoal membru PM nian.
Komandante Unidade PM, Majór Norberto Maria Carlos hateten, membru Unidade PM atual hamutuk 118, husi numere refere feto nain 4 mane 114. Tantu PM destaka Peletaun ida iha Baucau no Fronteiras Batugade hodi ajuda servisu Forsa no Seguransa iha terenu. Eus
Jornal Nacional