Prezidente Repúblika (PR), Taur Matan Ruak hatete, nia veta Orsamentu Jeral Estadu (OJE) tinan 2016, la’os atu hamonu Governu, maibe atu hadia buat ne’ebe mak povu sira infrenta.
“Foin dadauk ha’u veto OJE 2016, ne’e la’os atu hamonu ita nia Governu, maibe atu buka hadia buat sira ne’ebe mak prioridade liu ba ita ninia povu sira nia moris,”dehan PR, Taur Matan Ruak wainhira halo dialogu ho komunidade Suku Wairoque, Postu Administrativu Luro, Munisipiu Lautem, Segunda (18/01/2016).
Xefi Estado ne’e hatutan tan, se Prezidente Republika hakarak hatun Governu ida ne’e, hatun tiha ona iha tinan kotuk, maibe Prezidente lakohi atu hatun Governu maibe atu hatete ba Governu tenke tau matan ba Edukasaun, Saude no Agrikultura.
“Ha’u hakarak hatun Governu ne’e iha tinan kotuk ita eleisaun tiha ona, maibe ha’u lakohi, ha’u hakarak Governu atu tau matan ba ita ninia Edukasaun, Saude, Agrikultura,” PR Taur hatete.
Iha fatin hanesan Xefe Suku Wairoque Agusto Marques hatete, Orsamentu Jeral Estadu 2016 ne’ebe PR Taur veta ne’e hanesan fo xamada ba Governu atu hadia buat ne’ebe mak povu sira preokupa durante ne’e.Mia
Jornal Nacional