Tuir monitorizasaun Organizasaun Noun Governamentais (ONG) Judicial System Monitoring Program (JSM) nia durante ne’e nota katak, fallansu bo’ot iha Governu nia laran hodi impede lala’ok justisa mak imunidade membru Governu sira nian.
Vise Diretur Judicial System Monitoring Program (JSMP), Lasimiro dos Santos informa katak, iha monitorizasaun JSMP nian durante ne’e, detekta katak, failansu ne’ebé bo’ot liu iha Governu mak, imunidade.
“Imunidade ne’e mak durante ne’e, ninia prosesu atu hasai membru Governu sira ninia imunidade ne’e mak, difisil uit oan,”informa Lasimiro ba JN-Diário iha nia kna’ar fatin Colmera Dili, Kinta (01/10).
Nia hatutan, situasaun ida ne’e mak impede Tribunal atu ezerse nia funsaun, li-liu atu julga kazu sira ne’ebé mak involve membru Governu sira.
Maibé Lasimiro dehan, ba asuntu ida ne’e, desde uluk kedas, JSMP husu ona Parlamentu Nasionál atu konsidera hodi labele impede justisa.
“Husu ba Parlamentu no Governu atu konsidera ho kolabora ho Tribunal atu hasi imunidade ba membru Governu sira nian,”informa Lasimiro. Nia afirma, agora dadauk mós kestaun ida ne’e, Governu mós fokus ba área ida ne’e, hodi hadi’a justisa.
Oras ne’e dadauk parte justisa infrenta problema oit oan kona-ba membrus Governu sira nia imunidade, tanba atu lori sira ba presta deklarasaun iha Tribunal, Parlamentu Nasionál tenke hasai sira nia imunidade.
Tanba problema imunidade ne’e mak, to’o agora membru Governu balu no Prezidente Parlamentu Nasionál seidauk bele ba presta deklarasaun iha Tribunal, tanba sira nia imunidade seidauk hasai.cos
Jornal Nacional