Prezidente interinu Comisão Homenagen Supervizaun Registo e Recursos (CHSRR) Custódio Belo ‘Alin Laek’ informa katak, pagamentu veteranus tinan 2015 ne’e CHSRR garante katak la’o ho di’ak, tanba veteranus ida-idak mai ho ninia responsabilidade rasik no prosesu pagamentu ne’e organizadu ona.
“Prosesu pagamentu tinan ida ne’e sei la’o ho di’ak tanba la hanesan ho pagamentu iha tinan uluk ne’ebé maka nakonu ho manobra no manipulasaun, hau hanoin agora ne’e la akontese ona tanba veteranus ida-idak mai kedas ho ninia responsabilidade rasik no tanba prosesu pagamentu ne’e organijadu no fila mos ho organijadu, ne’ebé fallansu ne’e minimu la hanesan tinan uluk ona”, hateten Custodio Belo ‘Alin Laek’ ba JN-Diário iha ninia kna’ar fatin Caicoli-Díli, Kinta Feira (01/10).
Nia esplika, pagamentu tinan 2015 ne’e la’o ho di’ak no seguru tanba mai ho organijadu, tanba antes veteranus sira simu pagamentu primeiru tenke identifika uluk sira nia dokumentu ne’ebé maka sira lori hanesan kartaun eleitoral, númeru konta bankaria no sertidaun para sira mai konfirma lolo’os katak sira duni ka la’e.
“Agora ami servisu hamutuk ho banku funsionariu BNU ninian para sira mai identifika uluk iha ne’e maka foin ba iha departamentu pensaun antes pagamentu maka sei tula sira ba hodi simu sira nia direitu ne’e, no sira ne’ebé la liu husi prosesu iha CHSRR ba liu iha BNU ne’e sistema la premiti atu foti osa refere”.
Númeru benefisiariu ne’ebé maka atu simu osan ne’e lubuk ida tanba hahu’u husi loron 1 Janeiru 2014 ne’ebé osan mai fali 2014 no 2015 ne’e simu osan pagamentu kuaze miliaun 5 ba leten no total benefisiariu ne’e maka atu halo pagamentu ne’e hamutuk milaun 31.128, fundamenta Alin Laek.
Nia informa, kuandu benefisiariu balun ho kondisaun saúde no idade la premiti ona atu mai halo pagamentu ne’e tenke iha justifikasaun no dokumentu ruma para deklara benefisiariu ninia kondisaun liu husi ninia responsavel hodi esplika kondisaun refere hodi funsionariu banku bele halo pagamentu direita iha sira nia hela fatin ba benefisiariu sira ne’e para evita dezvius nian, hau hanoin ne’e dalan ida ne’ebé ita hili tanba sira labele la’o ona.
Depois ba oin benefisiariu ne’ebé maka kategoria 4 a 7 ne’e kada fulan simu $ 115 durante tinan ida nia laran de’it, I sira ne’ebé maka kategoria 8 a 14 maka simu kada fulan $ 276 no simu tinan-tinan.
Tanba orsamentu pagamentu ba veteranus ne’e ho montante ne’ebé bo’ot entaun CHSRR realija pagamentu primeiru ne’e iha Díli, depois ba oin fulan-fulan benefisiariu ida-idak simu iha banku BNU munisipiu ida-idak nian, dehan Alin Laek.
Benefisiariu sira ne’ebé maka ninia dadus sei iha prosesu nia laran ne’e tama hotu ona iha edital, maske sira nia dokumentu seidauk kompleta sira sei hadi’a hela no sira sei tama ba segundu pagamentu ne’ebé maka sei hala’o iha fulan Dezembru tinan ida ne’e.ves
Jornal Nacional