Hafoin hala’o selebrasaun misa requem iha Igreja Catedrál Nossa Senhora Imaculada da Conceição, Vila Verde Díli, mate isin Mgr. José Alváro Nolasco Santimano Menezes e Monteiro ba halót iha Semitériu Ailok Laran Díli, Segunda (03/10) iha tuku 15:30 HTL.
Sai husi Igreja Catedral Díli, akompaiña nafatin husi, Bispus, Padres, Madres no sarani sira iha Díocese tolu ne’e kontinua, reza ho hananu hodi la’o ba iha Semitériu Ailok Laran, iha Semináriu Maloa nia kotuk, ne’ebé dedikadu nu’udar Semitériu ba Padre sira nian.
Bispu Diocese Díli, Dom Virgílio do Carmo da Silva ne’ebé mak marka prezensa mós iha seremonia funeral ne’e, iha nia diskursu haklaken katak, Mgr José Alváro Nolasco Santimano Menezes e Monteiro, ne’ebé koñesidu liu ho amu Monteiro, la’os hanesan amu lulik baibain, maibé nu’udar misionáriu boot ida ne’ebé brani husik hela nia rai (Goa India), hodi hakat mai Timor hodi haklaken liafuan di’ak evanjellu nian.
“Kreda Timor, partikularmente Diocese Díli, dala ida tan iha tinan ida ne’e lakon nia amu lulik ida, ne’ebé iha tinan barak nia laran sai hanesan aliserse (fundador) ba fiar sarani iha kreda Timor. Pe. Monteiro la’os de’it amu lulik baibain, maibé mós nu’udar misionáriu boot ida, katak ida ne’ebé brani husik hela nia rai Goa India hodi hakat mai rai Timor la’os tamba atrai ba ai-moruk sandal (ai-kameli) Timor nian ka minarai iha tasi Timor, maibé tamba nia hadomi Timoroan, tamba nia sente Maromak bolu nia atu lori ba mundu, partikularmente Timor-Leste, lia fuan diak evanjellu ninian,”haklaken Dom Virgílio do Carmo da Silva hodi hanoin hikas Mgr. José Alváro Nolasco Santimano Menezes e Monteiro ninia moris.
Dom Virgilío do Carmo haktuir katak, amu Monteiro la’o hadulas rai doben TL, hanorin no fó sasin konaba mensajen Kristo Moris hias ninian iha Paróquia lubuk ida iha Timor, nia la’os hanorin de’it, maibé mós harii eskola, uma kreda lubuk ida, husi eskola hanorin ema atu sai ema ne’ebé diak no husi kreda forma ema atu hatene hadomi lolos ho nia maluk sira. Amu Monteiro la’os de’it harii, maibé nia mós mestre boot ida ne’ebé didika nia an iha eskola hodi eduka Timoroan sira.
“Nu’udar amu lulik no misionáriu nia fó an no laiha reserve, signifika, saran an tomak atu servi de’it Timoroan tomak nia diak, maski dalabarak mosu hanoin ne’ebé lahanesan ho nia kolaborador sira, maibé nia la desanima, korajem nafatin tamba Kristo mak nia forsa no Kristo mak nia motor. Nia saran an tomak ba Maromak no ba ita Timoroan sira, ba ita nia fó nia enerjia, saúde,matenek no vida tomak. Nia hadomi Timor to’o mate iha Timor, tamba nia domin ba Timoroan no ba kreda Timor. Tamba nia domin ba Kristo, nia halo an nu’udar profesór, konstrutór, katekista, pregador ho ekonómu,”haklaken Dom Virgílio do Carmo.
“Iha biban ida ne’e, ami sei sente lakon boot ho ita boot nia aujensia, hodi sarani Timor nia naran husi kiik to’o boot, husi sira ne’ebé mate tiha ona nune’e mós sira ne’ebé sira moris, ha’u hakarak hato’o ami nia obrigadu wain ba ita boot, ba buat hotu ne’ebé ita halo, liu-liu ba hahalok diak hirak ne’ebé ita halo tiha ona, maibé ami la konsege haree no la to’o mai iha ami nia koñesimentu,”Dom Virgílio hodi Timoroan tomak nia naran agradese ba amu Monteiro ba obra hotu ne’ebé nia halo durante hala’o misaun iha Timor.
Iha biban ida ne’e mós, amu Virgílio hodi Timoroan tomak nia naran hato’o diskulpa ba amu Monteiro ba falta de sensibilidade konaba buat diak ne’ebé Pe. Monteiro halo ba Timoroan sira, ka faltu atu koopera ho amu Monteiro iha nia misaun iha momentu hirak ne’ebé nia presiza, liu-liu wainhira nia moras.
“Maromak ami agradese duni ita boot ho fuan no laran, tamba haraik duni mai ami pastór boot ida, edukador boot ida ne’ebé hatene hadomi povu no rai ida ne’e, ami agradese tamba ita hadomi povu Timor no kreda Timor. Ami laiha buat ne’ebé folin liu atu fó ba ita boot, maibé ami nia sakrifisiu ho orasaun. Amu, keta haluha povu Timor, kreda Timor, Diocese Díli, harohan nafatin mai ami hotu iha Diocese ida ne’e atu hantene halakan nafatin iha ami nia fuan ahi karidade nian, hodi buka de’it servi Maromak no la hatene kole sem rezerve saran an tomak ba Maromak hanesan ita boot, dala ida tan, obrigadu no adeus, adesu i adeus,”hakotu Dom Virgílio do Carmo iha nia diskursu.
Iha fatin hanesan, Vigário Pastoral Diocese Díli, Pe. Juvito do Rêgo Araújo hodi Diocese Díli nia naran, agradese ba entidades tomak ne’ebé mak hola parte iha serimonia funeral ba amu Monteiro nian.
“Ba amu bispu nain rua, Dili no Maliana, señor Longinhos Monteiro ho nia familia, autoridades hotu, VI Governu konstitusional ninian, deputadus sira hotu ne’ebé iha ne’e ho sarani tomak Diocese Dili, Baucau no Maliana ne’ebé marka prezensa iha fatin ne’e, liu-liu sarani Bedois ne’ebé akompañia amu Monteiro to’o hotu, hodi Diocese Dili nia naran hau hakarak agradese ba maluk tomak nini tulun, orasaun, apoiu, kariñu ne’ebé manifesta, tantu pesóal no grupu ba amu Monteiro, desde ke nia sei serbisu hanesan Paróco iha fatin fatin nune’e mós wainhira nia reforma tiha ba hela iha Bedois, liu-liu iha momentu iha ne’ebé nia moras to’o loron ne’ebé nia husik nia is,” amu Juvito agradese ba entidades hotu ne’ebé partisipa iha ninia diskursu.
Nune’e amu Juvito mós agradese ba Ministériu Saúde(MS) ho ninia komponente tomak, liu-liu klinika sira iha Becora, ba Ministériu Solidariedade Social(MSS) ho nia ekipa tomak, Ministériu Interorior(MI) ne’ebé garante siguransa tomak, Ministéru Estatal(ME) ne’ebé empresta sasan tomak hodi organiza fatin serimonia nian hodi halot amu Monteiro nia isin mate ho dignidade, ba Bombeirus sira, Ministériu Obras Pública(MOP), liu-liu Servisu Agua no Saneamentu(SAS) ne’ebé fornese ona instrumentu sira hodi suporta amu Monteiro nia estadia ikus iha Bedois durante loron 2.
“Ami agradese mós ba grupu ropa mean sira ne’ebe fó sira nia kontribuisaun tomak sura labele, agradese mós ba Korpus Eskuteirus no ba grupu Santiago ho Soldadu de Kristo ne’ebé ami Monteiro rasik mak harii hela i sira sei moris nafatin to’o ohin loron no ohin sira presta homenjem ikus baa mu Monteiro.
Ami agradese ba eis membrus Konsellus Pastoral Paróquia Bekora ninian, ne’ebé maski amu Monteiro muda tiha ba Bedois sira la falta atu ba nafatin tau matan, koalia hodi fó apoiu, agradese ba Delta Nova ne’ebé fó ai-funan nomós ba maluk sir hotu ne’ebé lori sira nia kontribuisaun ba iha Paróquia Bedois no ikus liu ami agradese ba Paróquia Bedois, amu Paróco no frater sira hotu ne’ebé durante ne’e anima amu Monteiro, obirgadu wain ba ida ne’e,”Pe. Juvito agaradese ikus ba entidades tomka ne’ebé fó ona apoiu.
Entretantu serimonia funeral ba Mgr José Alváro Nolasco Santimano Menezes e Monteiro, hahú prosisaun husi Paróquia Santa Terezinha do Menino Jesus, Bedois Becora, dadersan tuku 08:00 Otl, akompañia husi Policia Nacional Timor Leste(PNTL), i depois foti dalan los, to’o iha Casa Europa, liuhusi Palácio do Governu, Seroja Dili, liu ba Hotel Timor ba Aportil Dili nia oin no to’o iha Igreja Motael. Tuir mai, sai husi igreja Motael mai Colmera, Postu Gloria, mai fali iha Marina, sai husi EDTL no liu ba igreja Katedral. Depois de misa remata iha Katedral, sai ba Maloa hodi tama ba Perunas Semitériu Ailok Laran to’o serimonia funeral remata tuku 15:30 Otl.
Partisipantes ne’ebé marka prezensa iha serimonia funeral ba amu Monteiro iha Maloa mak hanesan, Bispu Diocese Maliana, Dom Norberto do Amaral, Bispu Diocese Dili, Dom Virgílio do Carmo da Silva, representante amu Bispu Diocese Baucau. Vigário Geral Diocese Tolu nian iha Timor. Primeira Dama, Isabel Ferreira, Ministro Interior (MI), Longinhos Monteiro ho nia familia, membrus Parlamentu Nacional(PN), membrus Governu, no sarani husi Diocese Dili, Baucau no Maliana. Serimonia refere la’o ho diak tebes to’o remata tamba hetan apoiu siguransa masimu husi PNTL, unidade transitu nian no sarani barak maski loron manas, sira kontinua esforsu an ho entusiamu no lakole hodi ba partsipa iha serimonia ne’e to’o remata.ías
Jornal Nacional
