DILI - ONG Luta Hamutuk preokupa tebes ho projetu drainajen iha sidade Dili ne’ebé kontinua taka kuak loke kuak. Luta Hamutuk konsidera situasaun ne’e kontinua mosu tanba governu fraku iha kontrolu.
Luta Hamutuk foti ezemplu ida hosi projetu drainajen ne’ebé iha kedas edefísiu Luta Hamutuk nia oin iha Farol-Dili, kuaze fulan haat ona kompañia ba halo ku’ak tiha iha estrada klaran to’o agora seidauk taka.
Koordenador Divisaun Advokasia Luta Hamutuk, José Alves da Costa, hatete, situasaun ne’e halo sira triste tebes tanba governu fó projetu ba kompañia sira gasta osan estadu maibé abandona hela mos governu la tau atensaun.
“Ami ezije ba Ministériu Obras Públika atu tau matan ba iha projetu sira ne’ebé mak abandonadu iha kapital Dili,” José afirma iha konferénsia ba imprensa ne’ebé hala’oTersa (27/09), iha edefísiu Luta Hamutuk, Farol-Dili.
Liuhosi monitorizasaun, José haktuir, projetu ne’e laiha dadus ne’ebé mak klaru tanba kuadru informasaun.
“Ami lahatene projetu ne’e legal ka ilegal no ami la haré orsamentu hira mak gasta ba projetu ne’e no BOQ mos laiha kontratu mos laiha,” José lamenta.
“To’o agora kompañia mos ami la hatene klaru maibé ami haré dalaruma sira nia movimentu iha ne’e ninia membru sira hatais farda Montana Di’ak no ekipamentu balun mos hakerek Montana Diak,” José hatutan.
Nia parte husu ba Ministru Obras Públika atu halo kalrifikasaun ba iha projetu ne’e tanba lori perigu ba movimentu transporte sira ne’ebé mak iha inklui mos ema sira ne’ebé mak la’o ain no komunidade ne’ebé hela besik iha fatin ne’eba.
Iha fatin hanesan Diretór Ezekutivu Luta Hamutuk, Mericio Akara, governu tenke toma responsabilidade ba kestaun ne’e tanba governu mak hanesan nain ba projetu.
“Ami lamenta tebes ho obra ne’ebé maka kompaña sira abandona husik hela iha fatin protokolu hanesan ne’e, kuaze membru governu sira mos liu ba mai, maibé abandona hanesan ne’e de’it. Ida ne’e nia inpaktu ne’e ba ami sira ne’ebé maka hela iha ne’e.” Akara lamenta.(ljd/jxy)
Timor Post
