Jornal Nacional, editorial
Dia 4 Setembru 2015 ohin, selebra tinan 16 loron United Nation Mission in East Timor (UNAMET) anunsia resultadu konsulta popular ba mundo tomak nebe prokemerdekaan manan maioria (82%) no (18 % ) ba pro otonomia -Indonesia. Paska anunsia resultadu konsulta popular, militar, polisia no organizasaun semi militar nebe TNI no Polisia Indonesia ‘ milisia’ harii halo destroisaun ba infrastruktura, li-liu edifisius estadu, sunu populasaun sira nia uma no oho povu prokemerdekaan.
Bai-bain ema toman bolu Setembro Negro ka Setembru nakukun tamba milisia ho armadu nebe apoi husi polisia no TNI halo destroisaun no sunu povu kiik sira nia uma, oho ema arbiru no sunu tomak edifisiu sira estadu nian tomak iha kapita Dili.Krime kontra umanidade nebe milisia pro jakarta, TNI no POLRI halo nee asaun ida nebe kontra humanidade, oho ema no sunu buat hotu hotu nebe governu indonesia harii durante tinan 24 okupasaun.
Asaun brutalismo nebe milisia sira lansa halo vitima no familia vitima sira laran kanek hodi hein justisa lolos ba ninia ema nebe milisia no pro jakarta sira oho durante okupasaun ninia laran.Tinan – tinan komemora loron konsulta popular 30 Agusto no komemora loron 4 Setembru povu tomak komemora loron nee nakonu ho trizteza, balu lakon inan ho aman, fen no laen, oan no sasan.Tinan 16 liu tiha ona maibe povu kontinua triste, kontinua tamba lakon familia,riku soin no mos laiha justisa ba familia vitima sira nee. Tinan 16 nia laran nee povu senti lori hela naha toda ida iha nia kbaas.
Triteza nebe povu nee sofre lori fo todan ba prosesu desenvolvimentu nasaun nian tan nee , VI governu konstitusional realiza programa koremetan nasional atu bele haluha sentimentu triteza nebe povu sofre durante nee. Agora kestaun maka koremetan nasional nee ninia orientasaun lolos nee saida? Karik haluha ona buat hotu nebe akontese iha pasadu? oinsa justisa ba familia vitima sira? “Koremetan Nasional ne’e atu haluha tiha masakre sira akontese uluk ne’e ka nusa? atu haluha tiha rezultadu tiha konsekuensia funu nian ka nusa, konserteza ita moris bebeik ho odiu ho ita nia maluk balun ka ho ita família labele kontinua,” Carrascalão.
Los duni senhor, programa korementan nasional nee mosu derepeteni deit, laiha prepasaun ida nebe adekuadu, laiha esplikasaun ida nebe prefundo konaba koremetan, tamba povu barak lakumpriende saida mak korementa nasional nee. Iha ambiente ukun rasik an nee asves ita sira nee haluha an, lahatene saida mak ita halo iha tinan 16 kotuk ba nee.Los duni, ohin loron tamba rekonsiliasaun, simu malu no dame malu ona asves ita mak halo liu fali, ita maka sai fali heroi boot ba iha ukun rasik an nee, afinal sala barak ita kometa, la kontribui ba ukun rasik an ida nee.
Ne’ebe hakarak ka lakohi serimonia koremetan nasional nee governu iha kompetensia atu halo, laiha ema ida mak sei impende maibe programa nee lori konfunasaun liu tan ba povu ida nee. *
Jornal Nacional