Estadu Timor Leste ho Vatikanu konkorda ona atu estabelese akordu ida kona-ba hanorin relijiaun katolika iha eskola sira iha Timor laran tomak, hodi bele hasa’e valor katolijismu ba jerasaun foun sira.
Primeiru Ministru Rui Maria de Araújo hatete katak, akordu ne’e, Estadu rua sei asina iha loron 14 fulan Agostu, ho objetivu atu estabelese relijiaun Katólika iha eskola sira iha territóriu nasionál.
“Prezidente da Repúblika sei halo diskursu iha misa ne’ebé hala’o iha 15 fulan Agostu , konkordata ne’e, sei asina iha loron 14 fulan Agostu 8,”dehan PM Rui Maria de Araújo ba jornalista sira, iha Palásiu Prezidensial, Aitarak-Laran, Segunda (03/08).
Rui Araújo dehan, iha sorumutu ho Prezidente da Repúblika ne’e mós, nia informa kona-ba programa saida mak atu halo iha loron selebrasaun ne’e.
Xefe Governu informa ba Xefe Estadu kona-ba prezensa Sekretáriu Estadu Santa Sé mai atu selebra festa tinan 500, iha Lifau Oe-Cusse.
Prezensa reprezentante Estadu Santa Sé ne’e mós, sei asina akordu ida kona-ba kooperasaun entre rai rua.
Durante ne’e, servisu refere lidera husi Ministériu Negósiu Estranjeiru no Kooperasaun (MNEK) inklui Igreza Katólika Timor-Leste nian.
Rui Araújo haktuir, prezensa igreja katoliku nian iha eskolas públikas, atu reforsa liu tan evanjelizasaun iha eskolas públikas sira.
“Ita mós tenke reforsa maka’as liu tan prezensa ita nian iha eskolas públika, tanba ita nia eskolas katolika nia númeru ne’e, ita bele sura ho liman. Ita nia populasaun sira nia oan barak mak la konsege hetan asesu ba eskolas katolikas, sira tenke ba eskolas públikas,”katak Rui Araújo.
Nia esplika, iha konkordata ne’e, oinsa Estadu ho igreja atu servisu hamutuk iha edukasaun Timor Leste nian.
“Ida formalmente iha ona akordu entre Estadu Timor Leste ho Vatikano, atu ita bele haree, oinsa atu bele dinamiza liu tan prosesu formasaun iha área edukasaun. Ha’u nia hanoin, se ita aposta maka’as iha aspeitu tolu ne’e hanesan, edukasaun familia, eskolas katolikas, i ita nia prezensa iha eskolas públikas, ha’u senti ita bele muda buat ruma iha jerasaun sira tuir mai ne’e, li-liu iha kontestu katolisismu ida ne’ebé responsavel no konsiente,”afirma Rui Araújo.cos
Jornal Nacional