DILI - Timor Leste (TL) kontinua lori Australia ba oin konaba kestaun fronteira maritima, too hetan rezultadu. TL mos kontinua ejiji nia direitu neebe Australia durante nee foti.
Tuir Peskizador ONG Lao Hamutuk Juvinal Dias katak Governu Timor Leste kria mekanismu ida bolu naran konsellu fornteira maritime, neebe sei kompostu husi politiku nain sira hanesan eis titulares no matenek nain balun, atu bele halao parte ba Prosesu negosiasaun fronteira maritima nia.
Maibee hosi ami Lao Hamutuk nia hanoin katak esforsu nee laos too ba nee deit, tamba ita hatene katak desde tinan barak nia laran ita lakon buat barak, ita lakon direitu ba tasi, liu-liu ba rekursu, bainhira Australia koko atu domina tasi Timor, sira hakarak hetan parte balun husi reseitas petroleum ho riku soin sira seluk, entaun ami hanoin katak estabelesementu fronteira maritima karik akuntese, tenki husu mos direitu sira seluk neebe durante nee sira foti, sira tenki fo fila,” hateten Juvinal, ba STL iha nia knar fatin Bebora, Dili, Kuarta (29/07/2015) .
Nia hatutan TL ejiji direitu husi pasadu nian ba Australia atu fo fila maka hanesan reseitas minarai husi CPDM, Australia mos hetan osan husi dezenvolvimentu elang Kakatua neebe dezenvolve hamutuk ho Indonesia depois TL lakon mos direitu ba area minaria koralin ho kampu mina rai balun neebe tama iha area desputa.
Iha parte seluk Observador Politiku Germano Ramos hateten kestaun riku soin tasi laran inklui fronteira maritima tenki determina, tamba TL nudar pais ida demokratiku, tenki hetan nia fronteira husi maritima, aero no treste. Informasaun kompletu iha STL Jornal no STL Web, edisaun Kinta (30/7/2015). Joao Anibal
Suara Timor Lorosae