VI Governu Konstitusiona liu husi enkontru Konselho Ministru deside no legaliza dia 7 no 31 Dezembru sai loron feriadu nasional, hodi re-memoria hikas ema lubun ne’ebe mak mate iha tempu ne’eba (7 Dezembru) inklui fo onra ba Prezidente Nicolao Lobato nia mate (31 Dezembru).
Sekretariu Estadu ba Konselho Ministru, Avelino Maria Coelho da Silva, hateten mesmu durante ne’e iha loron 7 no 31 Dezembru feriadu hela, maibe seiduak iha nia legalidade.
“Ami hatama proposta ba Parlamentu Nasional atu altera lei feriadu nian hodi aumenta tan loron rua ne’e sai loron feriadu nasional,” SE Coleho hateten, iha Parlamentu Nasional.
Nia rekonese, katak Timor loron feriadu barak tebes (total 16 loron feriadu) kompara ho nasaun sira seluk, maibe ida ne’e la fo impaktu ba produtividade no efetividade servisu funsionariu publiku sira.
“Tanba efetividade servisu funsionariu nian ne’e la depende ba loron feriadu sira ne’e, maibe depende ba ema idak-idak nia aan oinsa atu bele servisu ho kualidade,” nia dehan.
Iha parte seluk Deputada Ilde Maria da Conceicao, hateten Parlamentu sei haree proposta ne’e maibe loron rua ne’e importante tebes atu re-memoria fali saida mak akontese iha tempu pasadu.
Nia mos afirma, foin lalais iha konferensia bo’ot veteranus nian ne’ebe mak deside loron 3 de Marsu sai loron veteranus, ida ne’e mos parlamentu nasional sei tetu antes foti deside.
“Ami sei halo diskusaun no iha plenaria mak sei deside,” nia hateten.
Nia mos husu ba governu, tenke komprende kona ba diferensia entre loron komemorativu no loron feriadu, tanba loron komemorativu ne’e la feriadu, loron nasional mak feriadu.
“Hanesan loron feto nian no sinzas ne’e ita ba komemora tiha, depois ita mai fali servisu, balun la’e, sira ba tuir tiha serimonia e sira fila ba uma la mai ona servisu,” nia dehan.
The Dili Weekly