DILI - Komandu F-FDTL ho PNTL forma tiha ona ekipa ida hodi halo investigasaun ba kazu membru Unidade Espesial Polísia (UEP) kareta isin ida hurlele Segundu Sarjentu Quintão Soares iha area Laulara, Sesta (13/05).
Komandante Jerál PNTL, Komisáriu Júlio da Costa Hornay ho Xefe Estadu Maior Jeneral F-FDTL, Lere Anan Timur, maka forma diretamente ekipa investigasaun ne’e iha Segunda (16/05).
Investigador sira hahú ona investigasaun iha Tersa (17/05) hodi deskobre lolo’os motivu hosi kazu ne’e no identifika autor sira hodi ba hatan tuir lei.
Komisáriu Hornay afirma, la iha toleránsia ba membru ida halo infrasaun kontra regras de servisu, kona-ba kazu ida ne’e komandu PNTL sei suspende membru ne’ebé mak involve hodi submete ba prosesu investigasaun nian.
“Komandu sei hasai ordem suspensaun preventiva ba membru sira ne’ebé mak halo atusaun para ba submete prosesu investigasaun. Ami sei hein rejultadu investigasaun atu ami bele foti medidas forte ba membrus hirak ne’e,” Hornay hatete ba Jornalista iha Kuartel Jeral PNTL, Kaikoli, Tersa (17/5).
Iha fatin seluk, Maijor Jenerál Lere Anan Timur husu ba komunidade tomak atu la bele pániku ho akontesementu membru polísia baku membru F-FDTL, fiar metin ba instituisaun rua sei la kria problema.
Nia reafirma, kuandu polísia uza forsa baku ona ema ne’e krimi ona, polísia labele sai hanesan Cow Boy fali, sé provoka malu hanesan ne’e mak mosu problema ruma fó konsiekonsia ba povu la’ós ba forsa rua, forsa rua kontinua di’ak nafatin de’it povu mak terus, hanesan krize 2006, F-FDTL ho PNTL kontinua simu ransu, osan sa’e kareta maibé povu terus mesak.
Ministru Defeza, Cirilo Cristovão hatete, parese iha duni individu balun iha PNTL maka ultrapasa demais ona ke tenke foti medidas sériu.
Ba Jornalista sira iha Palásiu Governu, Cirilo subliña, polísia iha regulamentu forsa nian, forsa mos iha disiplina militar baziea ba investigasaun rekolla dadus sira hodi instituisaun ne’ebé mak tutela hodi toma medidas ba nia elementus sira.
Cirilo iha intrevista hatete, hein katak ekipa konjunta ne’ebé mak forma hosi PNTL no F-FDTL bele rekolla informasaun ba kazu ne’e los hodi bele foti medidas konkreta ba aktus ne’ebé mak membru sira halo.
Entretantu Membru Komisaun B ne’ebé Trata Asuntu Defesa no Seguransa David Dias Ximenes (Mandatu ) haktuir, pólisia kuandu baku ona ema se de’it, ne’e sala, tanba halo violasaun integridade, ne’e iha kódiku penal kóndena kedas.
Ema ida iha mundu, sidadaun ida nia liman labele kona fali ema seluk, anaunser uzu de fórsa, mas uzu de forsa tenke ekilibriu ho ejistensia, labeleover ecting, ne’ebé sei pólisia balu, ne’e polísia sala.
Mas oknum polísia ida halo ne’e, nu’udar sidadaun tenke halo prosesu kona-ba ba nia, alende prosesu disiplinar, bele iha mós prosesu kriminal.
Vítima Segundu Sarjentu Quintão Soares katuir kronolozia akontesementu, nia ho nia primu ida fila hosi mate uman to’o iha postu guarda Florestal nian iha area Laulara, sira nain rua para hodi so’e bee. La kleur UEP kareta ida liu haré sira nia motor para hela iha estrada boot ninin tu’un ba estrada kiik ida, membru UEP sira iha kareta laran hakilar muda motor ne’e.
Vítima nia primu muda motor ne’e ho neneik tanba motor mate hela, maibé UEP sira ne’e hakilar muda lalais motor. Tanba ne’e, vítima mos bolu ba nia primu ne’e atu muda motor lalais, maibé polísia sira ne’e fila hakilar “ o” ko’alia saida tun baku vítima to’o mate ki’ik.
“Ha’u mós hasé tan primu ne’e dehan o muda motor ne’e sees tiha para polísia sira liu. Ida ne’e mak sira tun dehan o ko’alia barak liu, ne’e mak ha’u dehan la’e. Maibé tuku kedas ha’u, tebe kotuk laran mak ha’u dehan ha’u forsa ida, maibé sira dehan forsa ne’e mak ami buka,” haktuir vítima ne’e ba Jornalista iha HNGV, Sábadu (14/5).(gus/way)
Timor Post