Nutrisaun ladi'ak afeta liu metade hosi labarik timoroan sira ne'ebé seidauk to'o tinan lima, maski iha di'ak oituan, ho problema ne'ebé aumenta tanba ladún iha informasaun kona-bá hahán, haktuir hosi organizasaun la'ós governu nain (ONG) lokal ida.
Tradisaun, kultura, rendimentu hosi família no asesu ba bee-moos hanesan fatór sira seluk ne'ebé influensia nutrisaun hosi família timoroan sira nian, haktuir hosi responsável hosi organizasaun HAMI, Rosaria Martins da Cruz.
HAMI ("Hamutuk Ita Ajuda Malu") hanesan organizasaun ida ne'ebé serbisu iha área saúde no nutrisaun iha Timor-Leste, hanesan problema ida importante tebes ba populasaun barak.
Iha deklarasaun sira ne'ebé haktuir hosi imprensa timoroan, responsável hosi HAMI epslika ona, hodi refere informasaun hosi Ministériu Saúde, katak nível sira nutrisaun ladi'ak di'ak ona hosi 58% iha 2010 ba 50,2% iha 2013.
"Aumenta kampaña sira edukasaun nian hanesan importante hodi kombate nutrisaun ladi'ak iha nasaun", nia esplika no hatutan katak "ne'e tulun komunidade lokal sira hodi mantén dieta ekilibradu ida".
Pedro Caniço, diretór nasional Saúde Públiku nian, hatete katak impaktu hosi nutrisaun ladi'ak senti iha moris tomak, ho labarik sira iha difikuldade maka'as ba aprendizajen no bele hetan lalais infesaun no moras sira.
"Kombate nutrisaun ne'ebé ladi'ak hanesan prioridade ida Governu nian. Ami hala'o daudaun programa sira hodi fahe vitamina A no ami fahe suplementu alimentar sira ba feto isin-rua sira no ba inan sira ne'ebé fó susu", nia esplika no haktuir hosi imprensa.
SAPO TL ho Lusa