Planu hosi reforma fiskal ne'ebé Governu timoroan hakarak implementa sei inklui medida sira hodi hametin integridade hosi instituisaun governamental sira ne'ebé relasionadu ho arekadasaun hosi reseita sira, hodi buka hamenus no prevene korupsaun, fó sai hosi ezekutivu.
Iha komunikadu, Ministériu Finansa esplika katak ne'e hanesan objetivu ida serbisu nian hosi Komisaun Reforma Fiskal, ne'ebé prepara hela alterasaun sira iha kuadru tributáriu tomak iha Timor-Leste.
"Ami fiar katak importante afirma loloos ami nia ajenda hodi hametin integridade, hahú hosi programa tomak reforma fiskal nian", hatete hosi ministra Finansa, Santina Viegas-Cardoso, ne'ebé haktuir hosi komunikadu.
"Bainhira reforma sira hahú implementa, ema hotu tenki hatene katak sira nia kontributu ba Estadu, liuhosi impostu sira no taxa sira ne'ebé sira seluk, sei hanesan protejidu. Governu sei foti medida importante sira hodi hametin katak reseita hosi ema sira sei ba diretu kofre Estadu nian", nia hatutan mós.
Tuir ministra, "Governu hakarak iha ajénsia sira moos no tranparente hodi hili rekolla reseita sira no hodi garanti katak osan sei dedika ba povu timoroan nia moris di'ak".
Fernanda Borges, kordenadora hosi komisaun reforma fiskal nian, subliña iha komunikadu hanesan katak importante konta ho dalan sira hodi garanti integridade iha rekolla hosi reseita sira impostu nian.
Lei sira antikorupsaun ne'ebé maka'as, sistema teknolójiku ida ne'ebé efisiente no sistema no prosedimentu sira ne'ebé kapasita di'ak funsionáriu sira hanesan elementu integrante sira iha esforsu ne'e, esplika hosi Fernanda Borges.
Kolaborasaun maka'as entre alfándega sira no komisaun antikorupsaun, hanesan ezemplu, hanesan hakat foun ida hodi kombate korupsaun iha nasaun, medida foun sira sei implementa neineik, haktuir hosi Adérito Tilman hosi Komisaun Anti Korupsaun (CAC).
CAC sei aprezenta ba Governu rekomendasaun preliminár sira kona-bá dalan sira seluk ne'ebé bele halo parte iha prosesu reforma fiskal hodi tulun kombate ba korupsaun, nia esplika no haktuir hosi komunikadu ofisiál ne'e.
Persepsaun aas hosi korupsaun iha Timor-Leste hanesan asuntu ida ne'ebé debate maka'as hosi sosiedade timoroan, hala'o daudaun iha justisa prosesu oioin hasoru titulár no eis-titulár sira hosi kargu polítiku sira.
SAPO TL ho Lusa – Foto: EPA / António Amaral