DILI – Membru Governu husi Partidu Demokratiku (PD) hamutuk nain 4 foti ona desizaun kontinua asumi kargu iha Sestu Governu Konstitusional ho dalan independente, maibe iha nain 2 mak too oras nee seidauk foti desizaun.
Informasaun nee fo sai husi Sekretariu Jeral Partidu Congresu Nasional Reconstruksaun Timorense (CNRT) Dionisio Babo, ba jornalista sira iha Palacio do Governu, Segunda (2/4/2016).
Karta neebe mak ami haruka ona ba kolega sira husi PD, ami simu ona resposta husi Ministru Gastao de Sousa, Constancio Pinto, Nino Pereira no Marcos da Cruz, tanba sira iha hanoin diak ba nasaun ida nee no kontinua fo kontribusaun ba estadu entaun sira mai hanesan independente,” dehan Babo.
Nia hatutan maske Ministru nain 4 nee hatoo ona resposta hodi responde ba karta CNRT nian, maibe iha nain rua mak too oras nee seidauk fo resposta hanesan Ministru Antonio da Conceção nomos Samuel Mendonça, tanba nee CNRT sei kontinua hein tan loron hira nia laran resposta husi membru governu PD nain rua nee.
Iha fatin ketak tuir Deputadu, Cesar Valente de Jesus, husi Bankada CNRT mos hatete desizaun neebe mak CNRT foti nee laos arogan hanesan ema seluk ninia hanoin, tanba tuir nia wainhira politika la hanesan ona maka tenke fahe malu.
Nunee mos observador politika iha ninia estudu fatin UNTL, Grigorio Fatima, katak mudansa politika neebe maka akontese iha TL nee normal, tanba iha nasaun barak mos infrenta ona situasaun nee, maibe importante mak kria pas no estabilidade nafatin. Informasaun kompletu iha STL jornal no STL Web, edisaun Tersa (3/5/2016). Thomas Sanches
Suara Timor Lorosae