Polisia Sientifika Investigasaun Kriminal (PSIK) hamutuk ho Alfandega, Tersa (26/04/2016), sobu tan kontentor 4 iha Portu Dili ne’ebe mak diskonfia ilegal.
Bainhira PSIK sira loke kontentor 4 ho numeru TEX TGHU 3406069 2261, CAI CAXU 6421968 2261, TEX TEMU 2160092 2261 ho CAI CAXU 6478276 2261 ne’e tua ho marka SOZU ne’ebe mak ho nia alkohol 75,8% mak iha kontentor nia laran.
Diretor Jeral Alfandega, Jose Abilio hatete, PSIK mai sobu kontentor, tanba hetan mandadu husi Tribunal, tan ne’e antes sobu kontentor ne’e kopera uluk ho Alfandega hanesan instituisaun ne’ebe mak responsabiliza kona ba kontentor sira ne’ebe mak tama sai.
‘’Kontentor 4 ne’e tama kleur ona i ami prosesa administrativu desde fulan Outubro tinan kotuk, maibe kompania nain ne’e la iha posibilidade atu selu administrativu dada to’o deit agora, entaun ami atu halo lelaun ona, maibe tanba nain ne’e polisia invetiga intregha ba tribunal, entaun tribunal hasai mandadu loke kontentor ne’e,’’ informa Jose Abilio ba jornalista sira iha Portu Dili.
Jose mos la konsidera sasan sira ne’e ilegal, tanba sira prosesa hela administrativu, maibe tanba kompania nain mak la iha posibilidade dada hela deit to agora, depoois fo tan notifikasaun mos nia la responde.
Nia mos informa katak, nain ba kompania ne’e serteza laos ema Timor, maibe ema husi China ou Singapura, tanba sasan ne’ebe mak detekta ne’e tua ho letra China nian no dala ruma mos Timor oan sira mak join ho ema estrangerio.
Iha parte seluk, Jose Abilio, mos informa kona ba funsionario Alfandega nian ne’ebe polisia sira kaer hamutuk nain 7 ne’ebe mak polisia sira kaer husi kazu Maliana to mai iha Portu Dili ne’e oras ne’e dadaun hetan ona Termu Identidade Residensia (TIR) husi tribunal.
Jose hatete, oras ne’e dadaun sira hein hela prosesu kontinuasaun hodi hetan desizaun final husi tribunal hodi hatene se mak sala.
Binhira jornalista sira tenta konfirma asuntu ne’e ho parte PSIK, maibe PSIK sira lakohi fo informasaun sira konsidera katak, prosesu ne’e lao hela hein rezultado iha mak sira foin bele fo informasaun. Nia
Jornal Nacional