Membru Parlamentu (MP), Deputada Bendita Magno, husu ba Ministerio Saude atu muda tiha pesoal saude ne’ebe atende paseinte la ho etika.
Tuir nia, pesoal saude sira ne’ebe trata no insulta pasientes ne’e la merese sai servidor saude.
“Pesoal sira ne’ebe attitude la diak, atende pasiente ho hakilar, husu atu muda sai sira, nune’e ema seluk bele tama fali hodi fo atendimentu ne’ebe dignu ba povu,” Deputada Magno sujere, iha Parlamentu Nasional.
Durante ne’e, nia dehan, mosu diskriminasaun ba povu tanba atendimentu ba membru governu mais espesifiku no diak maibe ba povu bai-bain atende ho hakilar no insulta sira.
Iha parte seluk, Deputada Maria Rosa da Camara “Bisoi”, lamentavel ho attetude ida ne’e, tanba nia rasik mos sai vitima husi mediku sira.
“Sira insulta no trata hau bainhira hau buka informasaun atu halo kontrolu ba hau nia moras,” nia lamenta.
Nia konta, iha dia 12 fulan Marsu 2016 bazeia ba karta husi mediku, nia tenke ba halo kontrolu ba nia moras. Bainhira nia to’o ba iha Ospital Nasional Guido Valadares (HNGV) sala da informasaun.
Nia dehan, pesoal saude haruka ba iha sala numeru 11, depois haruka ba fali sala 1 hodi registu, maibe pesoal sira labele atende, tanba ho razaun oras liu ona.
Bainhira nia koalia hela ho pesoal sira iha sala numeru 1, mediku ida insulta nia husi kotuk ho lia fuan mal etika.
“O nusa mai hamrik fali iha ne’e, la ba iha konsulta fatin ne’eba, o mak la’o bilan tun sa’e iha ne’e,” nia hasara tuir.
Ho akontesementu ne’e, nia husu, ba ministerio relevante atu muda sai pesoal sira ne’ebe laiha etika.
“Pasiente mai iha ospital atu salva vida, la’os hakotu vida, mediku trata ema ho etika no honestu, la’os trata no insulta fali ema,” nia lamenta.
Hatan ba kestaun ida ne’e, Diretor Jeral HNGV, doutor Jose Antonio alias Zeto, husu deskulpa ba deputada Maria Rossa Camara no pasiente sira ne’ebe sente ofendidu husi attetude pesoal saude balun.
Nia dehan, hahalok hirak ne’e akontese tanba servisu ne’ebe barak entau nudar humanu lakon kontrolu, entaun aktu sira ne’e bele akontese.
“Atendimentu barak demais ho atrapalha oioin, entaun mediku sira hasai lia fuan balun ne’ebe ofendida pasiente sira, hau husu deskulpa ba hahalok sira ne’e,” doutor Zeto husu deskulpa.
Nia hatutan, esforsu hotu sira halo ona liu –liu kapasitasaun kona ba etika servisu ba pesoal saude sira, maibe problema ida ne’e sei akontese beibeik tanba ne’e liga ho ema nia karakter.
“Tanba ema nia karakter hanesan ne’e, presiza tempu atu muda, maibe la taka dalan ba ita atu fo hanoin katak fo atendimentu ne’ebe mamar,” nia hateten.
Kona ba muda tiha pesoal ne’ebe attitude ladiak, nia dehan, presiza rona parte rua (pasientes ho pesoal saude), hodi halo estudu ida klean kona ba problemas, hafoin foti sansaun hasoru pesoal refere.
The Dili Weekly