Ministra Saude, doutora Maria do Ceo Sarmento Pina da Costa, hateten kontrusaun Ospital Referral Baucau (ORB) remata ona, maibe seidauk inagura tanba sei halo instalasaun.
Nia dehan, konstrusaun ospital ida ne’e hahu kedas iha tinan 2007 maibe paradu tiha. Iha tinan 2010 governu kontratu fali ho kompania (internasional) Ensul hodi hahu hikas kontrusaun ida ne’e, maibe seidauk 100%, sei halo hela instalasaun.
“Konstrusaun fizikamente remata ona kuaze 92%, maibe sei halo instalasaun ba sasan sira,” Ministra Ceo hateten, iha Sentru Konvensaun Dili.
Nia hatutan, prosesu tenderizasaun ba ekipamentus remata ona no agora daduan hein deit sasan sira ne’e tama mai no halo instalasaun.
Nia informa, governu aloka orsamentu $8 miloens resin ba konstrusaun ospital la inklui ekipamentus medikus nian.
Maske konstrusaun ne’e han tempu naruk, maibe nia hateten, laiha mudansa ba orsamentu, nafatin $8 miloens resin.
Iha parte seluk, Membru Komisaun E (Infra-estrukturas, transportes e Komunikasaun), Deputadu Manuel de Castro Pereira, prekupa ho konstrusaun ospital ne’e, tanba hahu kedas husi primeiru governu to’o mai VI governu maibe seidauk remata.
“Iha ospital Baucau ita haree moras sira toba fatin laiha no kondisaun ne’ebe la favorese, ita tau osan halo ospital ida hahu kedas iha primeiru governu to’o VI governu mos seidauk hotu,” nia lamenta.
Iha tinan kotuk (2015), nia hateten, governu promete atu inagura iha fulan Setembru 2015, maibe la akontese no projetu ne’e seidauk remata no paradu hela.
Tanba ne’e, nia ejiji ba ministerio relevante atu klarifika ba publiku kona ba razaun no obstaklu saida mak governu hasoru hodi implika ba konstrusaun ORB ne’ebe to’o agora seidauk finalize.
The Dili Weekly