Operasaun Komandu Operasaun Konjunta (KOK) iha Postu Administrativu Laga, Munisípiu Baucau, la’os buka Grupu Mauk Moruk de’it maibé kasa mós animal hodi oho. Iha foin lalais liu-ba, KOK kompostu hosi Polísia Nasionál Timor-Leste (PNTL) no FALINTIL-Forsa Defeza Timor-Leste (F-FDTL) oho balada fuik (rusa) iha parte ne’ebá.
KOK nia atuasaun ne’e, viola lei no órdem. Tuir lei no órden katak ema hotu-hotu tenki konserva meiu ambiente no proteje balada fuik. Tanba ida ne’e, governu oras ne’e luta maka’as hela atu ema hotu tau importánsia ba konservasaun meiu ambiente no proteje balada fuik.
Presiza proteje balada fuik sira tanba balada fuik sira hanesan rikusoin no sai mós hanesan instrumentu turizmu hodi dada turista sira mai vizita ita nia rai. Hetok hetan vizita hosi turista sira, ita bele hetan reseita doméstika hodi konstrui ita nia rai.
Tuir loloos, KOK hanesan implementadór lei no órden, nia maka tenki halo konservasaun ba balada sira. Bainhira KOK maka kontra ulu-uluk lei no órden, oinsá ho sidadaun sivíl sira? Sira (sidadaun sivíl) bele hanoin katak oho animál fuik ne’e iha valór ba sira tanba naan no iha valór ekonómika (tanba lori halo negósiu) no konsidera mós katak oho animál la’os krimi. KOK tenki evita hahalok ida ne’e tanba fó motivasaun la di’ak ba sidadaun sira seluk no estraga nasaun nia futuru.
Sujere mós ba Instituisaun Polísia Nasionál Timor-Leste no F-FDTL atu investiga oknum KOK ne’ebé maka komete oho balada ne’e. Presiza investiga atu bele hatene razaun saida maka sira estraga balada fuik no tanbasá sira tenki estraga kilat musan. Normalmente, kuandu forsa sira ba halo atuasaun ba kazu ruma iha terenu, sira lori kilat musan ne’ebé kontadu. Agora, oknum forsa sira ne’ebé ba estraga kilat musan arbiru de’it hanesan akontese oho balada ne’e, instituisaun atu fó sansaun oinsá? Hein katak tenki fó sansaun ba oknum hirak ne’e tanba estraga kilat musan hanesan mós estraga povu nia osan. (*)
Matadalan, editorial - opiniaun