DILI - Deputadu sira hosi bankada CNRT, FRETILIN, PD afirma, laiha problema ho hasai imunidade Prezidente Parlamentu Nasional Vicente Guterres nian hodi kontribui ba justisa hanesan sidadaun di’ak ida.
Iha uma fukun Parlamentu Nasionál, Deputada Domingas Alves da Silva ‘Bilou Mali’ hatete, depois Prezidente PN, Vicente Guterres fila hosi Brazil iha loron 12 fulan Abril, PN bele hasai ona ninia imunidade.
“Dia 12 Abril, kuandu nia to’o ona mai, ami haré oinsá para depois foti imunidade ba señor prezidente,” reprezentante povu ne’e informa ba Timor Post foin lalais ne’e iha PN.
Nia hatutan, hosi Tribunal mós haruka ona notifikasaun dala tolu mai Parlamentu Nasionál, entaun hosi partídu tenke kontribui para justisa ne’e bele la’o ho di’ak liu tan iha nasaun ida ne’e.
Nune’e mós, membru bankada FRETILIN, Deputadu Manuel Castro reforsa tan katak, bankada FRETILIN desde uluk kedas prontu foti imunidade Vicente Guterres hodi koopera ho justisa.
“Bankada FRETILIN ko’alia desde kuandu ita hotu-hotu tenke koopera ba justisa tanba ita hotu-hotu iha lei nia okos,”membru Komisaun C Parlamentu Nasionál ne’e informa ba jornalista sira iha PN, Kuarta (6/4).
Iha fatina hanesan, membru bankada PD, Deputadu Paulino Monteiro reforsa liu tan katak, bankada PD mós pronto foti imunidade Vicente Guterres hodi ba koopera ho justisa.
“Sé hotu-hotu konkorda hosi PD mós konkorda hodi foti imunidade ba Vicente Guterres,” nia dehan.
Entertantu, Deputadu Duarte Nunes, nu’udar mós Segundu Vise Sekretáriu Jerál Partidu CNRT hatete, kuandu Parlamentu Nasionál (PN), hasai imunidade ba Vicente Guterres maka nia sei labele halo nia kna’ar hanesan Prezidente PN.
“Ha’u hanoin ita kuandu hasai imunidade, imunidade laiha ona entaun nia (Vicente), labele halo nia kna’ar hanesan prezidente tanba nia sei ba Tribunal. Durante prosesu ne’e la’o nia labele halo ona kna’ar hanesan prezidente , ida ne’e maka regras ,”Nunes informa ba jornalista sira iha PN, Kuarta (30/3).
Aleinde ne’e mós Vise Prezidente Parlamentu Nasionál, Adérito Hugo da Costa, hatete, Prezidente PN, Vicente Guterres lidera hela delegasaun grupu nasionál CPLP nian ba partisipa simeira CPLP iha Brazil ne’ebé sei remata iha loron 11 fulan Abril.
“Ita maka prezidensial CPLP nian ba tinan rua komesa 2014 to’o 2015. Agora tama 2016 ne’e kompleta ona tinan rua, entaun ita tenke hand over ba membru foun CPLP nian ne’ebé atu toma lideransa hanesan prezidensial CPLP nian ba 2 anos ninian,” esplika Adérito Hugo foin lalais.
Bainhira maka nia (Vicente), fila fali mai, nia hatan, karta ne’ebé Prezidente Parlamentu fó hela ba Vise PN nain rua katak nia sei to’o iha ne’e iha 12 de Abril.(jos)
Timor Post