DILI - Xefe Estadu Maior Jenerál FALINTIL-Forsa Defeza Timor-Leste (F-FDTL), Maijor Jenerál, Lere Anan Timur husu ba intelektual sira labele kahur asuntu soberania ho mina-rai.
“Ha’u husu ba ita nia komunidade, ita nia juventude liu-liu ita nia intelektuais tenki hatene ko’alia, labele ko’alia sabra’ut, ita tenki tau soberania ketak, tau mina ketak, labele mina ho soberania tau hamutuk,”Maijen, Lere informa ba jornalista sira iha Palasiu Prezidensiál, Bairo-Pite, Dili, Kuarta, (06/04) hafoin enkontru ho Prezidente Repúblika (PR), Taur Matan Ruak.
Timor-Leste dadauk ohin loron moris iha situasaun ida ke batalla iha oin mak soberania nasionál, Timor-Leste tenki fó atensaun ba ejijensia Timor-Leste nian hodi halo negosiasaun ba fronteira marítima nian tantu nai ulun no populasaun tomak tenki fó atensaun maka’as.
Tanba soberania Timor-Leste ne’e la’os rai maran de’it maibé lalehan, tasi mós tanba hosi soberania sira ne’e mak Timor-Leste sai independénsia totál inkondisionál.
“Soberania Timor-Leste para ita ukun-an ne’e para independénsia totál inkondisionál i ita seidauk totál, ita seidauk iha tasi, lalehan ita seidauk iha lalehan entaun agora kombate foun ne’ebé ita hala’o ida ne’e mak importante liu,”Maijen, Lere hateten.
Situasaun institusisaun no situasaun polítika ne’e situasaun interna Timor-Leste nian maibé kestaun soberania ne’e estadu Timor-Leste ho estadu Austrália tanba ne’e timor-oan presija prepara-an di’ak liu tan, oinsa mak bele rezolve problema ne’e.
Xefe Estadu Maior Jenerál ne’e husu ba komunidade tomak lalika preokupa ho rumoris sira sobre dezestabiliza situasaun iha rai laran, maibé tenki timoroan hotu tenki kuidadu tanba ema balun iha kotuk mak kria rumoris sira ne’e.
Maijen Lere mós husu ba Organizasaun Non Govermentál (ONG) no matenek nain sira atu labele tráumatiza situasaun tanba buat ida sei la akontese iha rai laran.
“Liu-liu ONG sira, matenek sira hakarak tráumatiza situasaun, buat ida la akontese,”Maijen Lere garante.
Hanesan Komadando F-FDTL hateten instituisaun F-FDTL funsiona hanesan bai-bain, tanba ne’e labele tráumatiza situasaun.
Dala ruma ema balun mak hakarak estraga situasaun tanba atu estraga mós objeitivu Timor-Leste nian hodi defende luta ba nia soberania tasi timor.
“Ha’u husu ba ita hotu-hotu, timoroan hotu-hotu enkuandu buat ida laiha, ita lalika inventa sasan, i ba ONG sira lalika ko’alia arbiru de’it,”dehan nia.(dgx)
Timor Post