DILI – Prizioneiru sira nia direitu hanesan sidadaun sei la lakon, maske hanesan kondenadu neebe detein hela iha prizaun. Maibe direitu no dever hanesan ema umanu sei garante iha lei nia okos.
Tuir Ministru Justisa, Ivo Valente katak, tuir psikologia ema matenek nain sira tratamentu ba ema iha prizaun nee laos at maibe diak. Neebe estadu garante nafatin prizioneiru sira nia moris hanesan ema, garantia saude, hahan, bee hemu no ropa.
Alende nee garantidu nafatin informasaun no komunikasaun ho sira nia famillia tuir sira nia direitu neebe hatur ona iha dekretu lei. Nunee sira mos tenke halao dever iha prizaun laran no bainhira sai iha liur.
Hau orgulhu tebes ho kooperasaun sosiedade sivil ba seminar ida nee. Kontenti tanba bele foti topiku neebe importante tebes. Tanba governu ho limitasaun barak maibe sosiedade sivil sira sempre fanu no reforsa servisu governu nian liu-liu iha diresaun prizionais nian. Sosiedade sivil hanesan rede neebe fo apoiu servisu ba governu hodi garante ba diresaun prizional nian,” tenik Ivo liu husi diskursu iha seminariu nasional kona ba “haforsa servisu hamutuk orgaun relevante estadu ho sosiedade sivil hodi garante direitu prizioneirus” iha salaun Assosiasaun HAK, Farol, Dili, Segunda (28/03/2016).
Nia hatutan, prizioneiru iha prizaun rua, Gleno no Becora hamutuk 663. Husu numeru neebe mak iha krime homesidu mak domina liu iha prizaun laran, tuir fali mak krime violasaun seksual. Haree ba krime homesidu neebe makas tinan ba tinan, governu halo esforsu atu hamenus numeru homesidu.
Iha fatin hanesan Direktur Ezekutivu Assosiasaun HAK, Manuel Monteiro hatete, seminariu ida nee ho objetivu atu hametin koordenasaun servisu entre instituisaun sosiedade sivil no governu hodi, tau matan ba prizioneiru iha prizaun Gleno no Becora. Nunee mos bele hadia situasaun prizioneiru sira iha prizaun rua nee, no garantia prizioneiru sira bele sai sidadaun neebe diak ba nia familia nomos estadu bainhira remata sira nia pena iha prizaun. Informasaun kompletu iha STL Jornal no STL Web, edisaun Tersa (29/3/2016). Domingas Gomes
Suara Timor Lorosae