Moisés Vicente, opiniaun
Sobu tiha lei ne’e. Sunu tiha lei ne’e. Lei la serve no ba Timor-Leste lei ne’e la funsiona. Timor-Leste la’os nasaun dependente ida. Austrália hetan apoiu hosi nasaun boboot sira tanba ne’e hakarak halo konforme nia hakarak, Timor-Leste la’os nia kolonia. Problema fronteira marítima entre Timor-Leste ho Austrália ladauk hotu. Austrália kaer metin akordu ne’ebé uluk iha tempu okupasaun Indonesia halo ho Austrália hakat ba oin hodi tau ses tiha Timor-Leste nia direitu soberania fronteira marítima tuir Lei Internasionál. Maibé ohin loron Timor-Leste hanesan nasaun soberania ona. Vigáriu Jerál Episkopál Re Evanjelizasaun Diocese Díli, Pe. Juvito do Rego Araújo. (Jornál Matadalan SEMANÁL, 17-23 Fevereiru 2016).
Funu hasoru nasaun boot Australia laos funu direita ho tanki da quera ho kilat boot, maibé agora povu Timor-Leste fonu hasoru liu husi funu Diplomasia, halo funu liu husi Demostransaun pasifiku. Fronteira marítima ne’e direitu Internasionál ne’ebé pais Timor-Leste tenke hetan, maibé tanbasá maka Timor-Leste labele rezolve problema ida ho Austrália?. Sé Timor-Leste lebele hetan nia direitu fronteira marítima, diak liu sobu tiha Lei Internasionál marítima ninian tanba lei ne’e rasik la funsiona ba Timor-Leste. Timor-Leste nia luta ba nia ukun rasik-án durante tinan rua nulu resin haat (24), to’o mate mohu maibé nunka hakiduk too hetan Independénsia, no ohin loron mós Timor-Leste sei mantein pozisaun hodi luta ba nia direitu too hetan. Governo Austrália ulun toos atu rezolve problema fonteira marítima ho Timor-Leste tanba sira bazeia deit ba akordu ne’ebé Indonesia halo ho Austrália. Nasaun Indonesia nia okupasaun iha Timor-Leste nee mós ilegál, ne’ebé akordu hotu-hotu halo ne’e ilegál tanba la tuir lei. Austrália bazeia ba ne’e entaun Austrália mós ilegál hotu.
Iha parte seluk, Peskizadór Ekonomia ONG Lao Hamutuk Juvinal Diaz hateten saída maka Timor-Leste ezije agora ne’e atu husu nia direitu soberania. Austrália tenke deside liña fronteira marítima bazeia ba prinsípiu no lei internasionál. Timor ezije nia direitu soberania. Austrália nia kerakusan, egoizmu, hakarak atu buka manán deit atu bele benefisia sira Austrália, UNCLOS-United Nations Convention on the Law of the Sea iha prinsípiu rua atu rezolve fronteira marítima maka Mandatóriu no Negosiasaun Bilaterál. Austrália la sai hosi UNCLOS maibé sira hili dalan negosiasaun bilaterál atu rezolve problema fronteira marítima ho Timor-Leste, Juvinal Diaz hato’o kestaun ne’e ba Jornalista Matadalan SEMANAL iha MNEK, Segunda,15/02/2016. VI Governo Timor-Leste lidera hosi Primeiro Ministro Dr. Rui Maria de Aroújo fó kompetensia tomak ba Eis Primeiro Ministro Kay Rala Xanana Gusmão hodi lidera prosesu hirak ne’e, prosesu ne’ebé hasoru dezafius oi-oin, maibé dezafius hirak ne’e la hanesan ho sofrimentu luta Timor-Leste nian ho bala musan.Deputadu hosi Bankada Partidu FRETILIN Eládio Faculto, sente orgullu ho nomeiasaun Kay Rala Xanana Gusmão nian tanba nia nuudar líder máximu ba luta libertasaun nian. No kontinua ezerse ninia funsaun ne’ebé boot atu halo negosiasaun ba fronteira marítima nian. “Ha’u fó ha’u nia apoiu totalmente ba líder Kay Rala Xanana Gusmão tanba nia ema ida ne’ebé kualidade diak tebes atu halo negosiasaun iha futuru. Ne’eduni, ita iha esperansa boot hodi hetan rezultadu diak ho ita nia maun boot ne’e ninia papél ne’ebé sei uza durante negosiasaun”, dehan Deputadu Eládio Faculto iha Parlamentu Nasionál, Segunda, 15/02/2016.
Austrália rasik sees án ona hosi UNCLOS-United Nations Convention on the Law of the Sea, ka lei tratadu tasi nian. Austrália abandona hosi UNCLOS tanba tenta dezvia hodi hatudu ninia superpoténsia iha sudeste Aziátiku. Tanba ne’e nia (Austrália) abandona. Ne’e signifika katak nia hakarak kontribui ba ilegalidade ne’ebé maka iha, ou iha jogu foer. Hakerek na’in optimista katak Austrália sei lakon simpatia hosi nasaun barak bainhira nia hakarak lori povu Timor-Leste ba iha konsekuénsia ruma, no nasaun barak sei solidariza ba Timor-Leste hodi dudu Austrália ba iha negosiasaun ida ne’ebé tuir nórmas internasionais ninian. Ho kondisoens ne’ebé Timor-Leste infrenta, nu’udar nasaun foun, tuir loloos Austrália maka tenta posibilidade atu ajuda hodi hamri’ik ho ninia apoiu, laos atu esplora fali Timor-Leste ne’ebé kondisoens sei fraku. Tuir loloos nia maka ajuda para ko’alia ho Indonesia para bele fó direitu soberania ba fronteiramaritima Timor-Leste nian ne’ebé kompleta.
Hosi sorin seluk, deklarasaun hosi MKOTT-Movimentu Kontra Okupasaun Tasi Timor, iha loron 23 Fevereiru 2016 ne’ebé halao demostrasaun pasifiku iha Embaixada Australia nia oin iha Dili, MKOTT hamutuk ho ita nia maun Veteranus sira iha Timor-Leste, Estudantes Akademiku sira iha Timor-Leste, Sosiedade Sivil, Komite 12 Novembru. Iha momentu ne’e MKOTT hatete katak liu tinan haat nulu (40) ona Australia goza reseita hosi rekursu mina-rai no tasi nian iha area Tasi Timor ne’ebé loloos tuir lei no prinsipiu internasionál nian pertense ba Timor-Leste. Iha inísiu kedas Australia buka argumentu oi-oin atu justifika sira nia kaan-teen ne’e. Hanesan iha 1972, Australia halo akordu ho Indonézia atu define sira nia fronteira. Argumentu falsu ba “plataforma Kontinental” hosi Australia halo sira okupa, domina no nauk hosi povu Timor-Leste. Iha 1974, Kompañia mina-rai sira Australia nian deskobre kampu gas Greater Sunrise. Atu halo fasil sira hodi hetan riku-soin hosi Greater Sunrise no seluk tan iha Timor-Leste nia territóriu, Australia suporta invazaun Indonézia nian mai Timor-Leste iha 1975 ne’ebé oho besik ema 200,000. Bainhira Timor-Leste manán independénsia hosi okupasaun ilegál hosi Indonézia, Australia nafatin hakarak atu hetan porsaun balu hosi riku-soin povu Timor-Leste nian liu hosi obriga Timor-Leste atu rekoñese direitu balu Australia nian ba iha kampu mina-rai Elang Kakatua, Bayu Undan, Greater Sunrise no mós halo Timor-Leste tenke lakon nia direitu ba kampu mina-rai Laminaria, Corralina no Buffalo ne’ebé to’o ohin loron sei sai area disputa entre rai rua nian. Ema Australia barak mak hanoin katak sira nia Governu mak laran luak liu ba povu Timor-Leste, maibé buat ne’e la loos. Dezde 1999, Australia fó maizumenus biliaun $1.7 liu hosi programa asisténsia militár no sivíl nian mai Timor-Leste liu hosi mekanizmu bilateral no multilateral nian. Maibé, durante tinan sanulu resin ne’e hanesan, Governu Australia mós simu osan besik biliaun $5 hosi reseita sira hosi kampu petróleu no gas ne’ebé loloos pertense ba direitu Timor-Leste nian. Tanba ne’e, liu biliaun tolu ne’ebé Timor-Leste “fó” ona ba Australia halo Povu Timor-Leste mak sai Australia nia doadór boot liu, la’ós Australia mak Timor-Leste nia doadór boot.
Ho buat injustisa lubuk ne’ebé Timor-Leste enfrenta hela hosi okupasaun Australia nian ba Tasi Timor, nune’e, MKOTT-Movimentu Kontra Okupasaun Tasi Timor husu ba Governu Australia hanesan tuir mai ne’e:
Australia tenke respeita no trata soberania no dignidade nasaun Timor-Leste nian hanesan sira halo ba nasaun sira seluk iha mundu.
Australia tenke fila ba mekanizmu disputa fronteira maritima nian tuir jurizdisaun Tribunal Internasionál ba Justisa (International Court of Justice) no Tribunal Internasionál ba Lei Tasi nian (ITLOS).
Australia tenke halo negosiasaun ho Governu Timor-Leste ho vontade ne’ebé di’ak.
Australia labele kontinua argumentu kona-ba “Plataforma Kontinental” ne’ebé la válidu ona.
Australia nudár nasaun boot labele uza nia podér ekonomia no polítika iha rejiaun ne’e atu kontinua nauk futuru Timor oan sira nian.
Iha lidun seluk, Negosiador prinsipal ba delimitasaun fronteiras maritimas atual MPIE-Ministru Planeamentu no Investimentu Estratejiku Kay Rala Xanana Gusmão husu ba Timor-oan hotu atu hamutuk hodi luta hasoru injustisa, in moralidade, dez-onestidade, husi Governu Austrália atu deskuti delimitasaun fronteiras marítimas. Eis Komandante Supremu Luta Libertasaun Nasional ne’e dehan, Timor-Leste hetan ona nia Independensia maibé seidauk iha soberanu kompletu. Ita liberta ita nia rai durante tinan rua nulu resin hat (24) maibé ita seidauk liberta ita nia tasi iha tinan 30 ona ne’ebé ita tenke hamutuk fila-fali no tenke hanoin interese nasionál tau iha leten liu, dehan Xanana Gusmão iha Seminariu Hamutuk Existe ita nia Tasi husi Expansionista ou Konférensia Assosiasaun Brigada Negra iha Delta Nova, Comoro, Kuarta 16/3/2016. (Jornál INDEPENDENTE, 17 Marsu 2016).
Konkluzaun ba artigo ka opinião ida ne’e bazeia ba perguntas ne’ebé mensiona iha leten Governu Australia Laiha Direitu Atu Hadau Fronteiras Marítimas Timor-Leste nian. Tuir hakerek na’in nia hare katak iha inísiu kedas Governo Australia buka argumentu oi-oin atu justifika sira nia kaan-teen ne’e. Hanesan iha tinan 1972, Australia halo akordu ho Indonesia atu define sira nia fronteira. Argumentu falsu ba plataforma Kontinental hosi Australia halo sira okupa, domina no nauk hosi povu Timor-Leste. Iha 1974, Kompañia mina-rai sira Australia nian deskobre kampu gas Greater Sunrise. Atu halo fasil sira hodi hetan riku-soin hosi Greater Sunrise no seluk tan iha Timor-Leste nia territóriu, Australia suporta invazaun Indonézia nian mai Timor-Leste iha 1975 ne’ebé oho besik ema 200,000. Problema fronteira marítima entre Timor-Leste ho Austrália ladauk hotu. Austrália kaer metin akordu ne’ebé uluk iha tempu okupasaun Indonesiahalo ho Austrália hakat ba oin hodi tau ses tiha Timor-Leste nia direitu soberania fronteira marítima tuir Lei Internasionál. Maibé ohin loron Timor-Leste hanesan nasaun soberania ona.
Rekomendasaun ba atuál PM-Primeiro Ministro Australia Malcolm Turnbull, ami povu Timor-Leste husu ami ninia direitu soberania katak tenke rekoñese Timor-Leste nia liña fronteira Maritima ho Australia iha ninia fatin. Husu mós povu Timor-oan ne’ebé hela iha Australia atu halo nafatin demostrasaun pasifiku no ezije makas ba Governo Australia atu hare liña fronteira maritima Timor-Leste nian. Husu mós ba atuál Primeiro Ministro Australia atu hare fila-fali akordu MoU ba Tratadu CMATS asina ona hosi Ministru Negósiu EstranjeiruAlexander Downer no José Ramos Horta iha Sydney iha 12 Janeiru 2006, asiste hosi Primeiru Ministru John Howard no Mari Alkatiri.Povu Timor-Leste la nega buat ne’ebé ajuda ona mai povu Timor-Leste iha tinan 1999 liubá. Maibé fronteira maritima Timor-Leste ne’e buat ketak ida, ne’e direitu tomak Timor-Leste nian.
Ikus liu, husu mós Timor-oan iha rai laran atu mai hamutuk aluta kontinua nafatin halo demostrasaun pasifiku, ne’ebé mak sei organiza husi MKOTT-Movimentu Kontra Okupasaun Tasi Timor sei halo hamutuk iha Embaixada Austrália Díli, loron 22-23 Marsu 2016. Demostrasaun pasifiku ne’e halo hamutuk ho ita nia maun Veteranus sira iha Timor-Leste, Estudantes Akademiku sira husi UNTL-Universidade Nasional Timor Lorosae, UNDIL-Universidade Dili, UNPAZ-Universidade da Paz, UNITAL-Universidade Oriental Timor Lorosae, DIT-Díli Institute of Technology, IOB-Institute Of Business, Sosiedade Sivil, Komite 12 Novembru, Igreja no Parlamentu Nasional. Husu nafatin atu halao mós Diplomasia liu husi Ministru Negosiu Estranjeiru no Koperasaun Timor-Leste hasoru Governo Austrália nian. ***
*Artigu ida ne’e la representa Institusaun ne’ebé hakerek na’in haknar ba, maibé idea no argumentu sira ne’ebé lekar iha artigu ne’e nudar opinião pesoal. Hakerek na’in servisu voluntariu iha Fundasaun Mahein, Hanorin iha Ensino Secundário Católica São José Operário-Balide.
Referénsia:
v Timor Lo’as Austrália nia Kolonia. Asesu iha loron 5 Marsu 2016
http://timoragora.blogspot.pt/2016/02/timor-laos-australia-niakolonia.html,http://matadalan.com/timor-laos-australia-nia-kolonia/
v Timor-Leste Ezije Fronteira Marítima La’os Sai Inimigu ba Malu. Asesu iha Timor Agora, 7 Marsu 2016.http://timoragora.blogspot.pt/2016/03/tl-ezije-fm-laos-sai-inimigu-ba-malu.html
v Fundu Mina Rai Iha Ameasa Nia Laran. Asesu iha Timor Argora, 5 Marsu 2016 http://timoragora.blogspot.pt/2016/03/fundu-mina-rai-iha-ameasa-nia-laran.html
v Presidente Timorense reitera que fronteiras são assunto pendente na relação com Austrália. Asesu iha Timor-Agora, 4 Marsu 2016. http://timoragora.blogspot.pt/2016/03/presidente-timorense-reitera-que.html
v http://laohamutuk.blogspot.com/2016/02/mkott-deklarasaun-ba-governu-australia.html. Asesu iha loron 15 Marsu 2016
v http://laohamutuk.org/Oil/Boundary/2015/FreitasContinentalShelfAgrmt.pdf,http://laohamutuk.org/Oil/Boundary/CMATSindex.htm, https://aitaraklaranlive.wordpress.com/2014/03/19/istoria-badak-no-estatuta-tasi-timor/
v UNDIL-Universidade Díli Hala’o Palku Livre Diskuti Fronteira Marítima. Asesu iha Jornál Nacional Diário, 16 Marsu 2016, pajina, 14
v Xanana Gusmão Fanu Espiritu Timor-Oan ‘Luta’ Hasoru Governu Austrália. Asesu iha Jornál INDEPENDENTE, 17 Marsu 2016, pajina, 1-11
v Xanana Gusmão: Funu Libertasaun Seidauk Hotu. Asesu iha Jornál Diariu Timor Post, 17-3-2016
v Xanana Gusmão: Deskonfia Timor-Oan Balun Faan Timor. Asesu iha Jornál Suara Timor Lorosae, 17-3-2016