Partidu CNRT lakon konfiansa ona ba Prezidenti Parlamentu Nasional (PN), Vicente Guterres. Tanba ne’e, iha tempu badak, CNRT sei halo “mosaun sensura” hasoru Vicente Guterres hodi obriga Vicente tenke sai husi nia kargu no sai husi partidu CNRT.
Informasaun ne’ebe halibur husi dirijentis sira CNRT nian katak, buat barak maka Vicente Guterres halo falha, liu-liu, la iha vontade atu asegura politika CNRT nian iha PN em relasaun ho interese nasional.
Rajaun balun ne’ebe CNRT fundamenta hodi lakon fiar ba Vicente Guterres, tanba mos la iha vontade atu kolabora ho justisa, kona-ba kazu alegasaun abuju de poder no korrupsaun ne’ebe Tribunal haruka ona karta notifikasaun ba PN atu hasai imunidade.
Seluk fali, CNRT ladun senti kontenti ona ho Vicente Guterres, tanba la obdiese ona ba partidu CNRT no la tau prioridade ba lei sira nebe importante atu deskute iha plenaria.
Vise Prezidenti Parlametu Nasional nudar mos membru Bankada CNRT, Aderito da Costa Hugo, hateten, novidade atu hasai Vicenti Guterres husi Prezidenti PN no husi CNRT ne’e hanesan espekulasaun deit.
“Emprinsipiu CNRT halo duni avaliasaun ba kuadrus hotu hotu CNRT nian ne’ebe ejerse knar iha ezekutivu ho legislativu,”hateten Aderito Hugo hodi desmente lakohi fo komentariu ba situasaun CNRT ho Vicente Guterres, ne’ebe ladun harmonia ona.
“Ita bo’ot sira hare Deputadu Vicente Guterres mos Deputadu husi bankada CNRT nebe que hetan konfiansa hanesan Presidente Parlamentu Nasional ninian, halo avaliasaun ba kargu sira ne’e hotu liu liu ba kuadrus nebe CNRT nian, agora to’o iha nivel nebe ita bo’ot sira dehan ne’e hau labele komenta ba ida ne’e,” informa Aderito Hugo.
Los ka lae CNRT atu halo “mosaun sensura” hasoru Vicente Guterres, Vise PN ne’e ho diplomasia dehan, nia la bele komenta tanba sei iha prosesu nia laran no kuadru CNRT nian hotu tama iha avaliasaun.
“Avaliasaun ne’e interna partidu nian, ne’ebe la presiza lori ba konsumu publiku,” afrima Aderito Hugo.
Informasaun husi sikun seluk, katak, hahuu fulan kotuk partidu CNRT halo avalaisaun pro-ativu tebes ba nia dirijentis sira, atu nune’e, ba oin la iha tan ona dirijentis ne’ebe halimar politiku iha malahok laran no ulun rua ka hahalok hanesan ema “farijeu” sira iha partidu nia laran.
Wainhira jornalista JN-Diario tenta halo konfirmasuan direita ba Prezidenti PN, Vicenti Guterres, maibe nia lakohi fo komentariu. nes
Jornal Nacional