Polísia indonéziu oho xinés uigur na'in rua ne'ebé deskonfia halo parte iha grupu estremista ne'ebé nia líder iha lugasaun ho Estadu Islámiku (EI), hatete hosi funsionáriu ida hosi nasaun ne'e.
Membru sira hosi grupu etnia musulmanu ne'ebé ki'ik mate iha tiruteiu ida iha loron-tersa dadeer iha foho sira iha illa Sulawesi, iha sentru Indonéziu nian, bainhira autoridade sira buka líder hosi grupu radikál, Santoso.
"Ami bele konfirma katak sira na'in rua ne'ebé mate hanesan ema uigur", hatete hosi xefe polísia Sulawesi nian ba AFP.
Governu indonéziu lansa beibeik operasaun oioin hodi bele kaer líder grupu nian ne'ebé promete lealdade ba Estadu Islámiku (EI).
Ema uigur barak ne'ebé kombate iha Indonézia mai hosi provínsia xineza Xinjiang, ne'ebé minoria musulmanu sai hanesan vítima hosi represaun kulturál no relijiozu, hakerek hosi AFP.
Iha fulan-Jullu, ema xinés na'in tolu ho orijen uigur hetan kondenasaun ba kadeia tinan ne'e tanba terorizmu, hafoin hakarak hamutuk ho grupu ne'ebé lidera hosi Santoso. Operasaun atuál envolve polísia no militár na'in 2.000 resin.
Indonézia deklara ona nia "funu rasik hasoru terorizmu" hahú hosi atentadu sira iha Bali iha tinan 2002 ne'ebé halo ema na'in 202 mate.
Iha tinan ne'e iha loron 14 Janeiru, sentru Jakarta sai hanesan fatin hosi atentadu suisidu ne'ebé reivindika hosi EI.
SAPO TL ho Lusa