Sekretáriu-ezekutivu CPLP nian lamenta ona, iha loron-segunda ne'e, krizi polítika foun iha Guiné-Bissau no fó sai katak sei halo vizita iha nasaun luzófonu ne'e entre loron 10-12 Fevereiru hodi bele tulun autoridade iha Guiné-Bissau hodi halakon krizi.
"Triste tebes tanba, to'o ohin loron, Guiné-Bissau la hetan dame no estabilidade hodi bele dedika ba kestaun sira dezenvolvimentu nian. Hafoin simeira iha Bruxelas, ami hotu senti optimizmu katak ne'e sei akontese", hatete hosi Murade Murargy ba Lusa bainhira hakotu reuniaun hosi pontu fokál sira kona-bá Serbisu Infantíl iha Estadus membru sira hosi Komunidade Nasaun sira Lian Portugés nian (CPLP) ne'ebé hala'o iha Lisboa to'o loron-kuarta.
"CPLP, hamutuk ho organizasaun internasionál sira seluk ne'ebé hanesan ita nia parseiru sira, halo beibeik apelu ba Governu no ba Prezidente Repúblika Guiné-Bissau nian hodi reflete oituan no hanoin iha povu nia terus no hodi hetan dalan ida hodi halo dame nasaun no hetan Governu ida ne'ebé bele iha empeñu iha kestaun sira koperasaun no dezenvolvimentu ekonómiku", hatutan hosi diplomata mosambikanu.
Murade Murargy adianta katak sei, hamutuk ho prezidente CPLP nian, xefe Estadu timoroan, Taur Matan Ruak, sei desloka ba Guiné-Bissau "hodi haree oinsá bele kontribui ba diálogu entre forsa sira iha Nasaun guiniense, hodi nune'e bele fó hakat ba oin".
Nia hatutan katak atividade sira ba vizita hahú ona no deslokasaun halo akompaña ka la'e hosi Governu, hodi manifesta esperansa katak programa hosi ezekutivu guiniense sei aprova iha Parlamentu iha semana ne'e.
"Ami hein semana ne'e hodi haree kona-bá aprovasaun hosi Programa Governu nian, maibé iha esforsu tomak katak ne'e sei halo iha nível internu hodi bele ultrapasa krizi ne'e, ka momentu konfuzaun ne'ebé Guiné-Bissau hasoru daudaun", nia hatete.
Murade Murargy fó hanoin katak foin lalais ne'e ko'alia iha Luanda ho Prezidente Guiné-Bissau nian no José Mário Vaz aprezenta ba nia razaun sira kona-bá krizi polítiku iha nasaun, liuliu "diverjénsia institusionál sira" ne'ebé fahe Asembleia Nasionál Popular (ANP) ba parlamentu rua.
"Ami hakaran entende oituan saida maka akontese iha nasaun hodi nune'e nasaun bele ultrapasa diverjénsia institusionál sira", nia hakotu.
SAPO TL ho Lusa