Númeru hosi alunu sira ne'ebé frekuenta aula sira portugés nian iha Namíbia aumenta maka'as, hosi na'in 280 iha tinan 2011 ba na'in 1.800, hafoin Governu portugés asina tiha akordu ida ho nasaun ne'e, hatete hosi fonte ofisiál.
"Bele haree (aumenta ba interese iha lian portugeza iha Namíbia). Bainhira ita asina memorandu entendimentu, ami hahú ona ho alunu besik na'in 280 no, agora daudaun, iha na'in 1.800", hatete hosi Angelina Costa, kordenadora adjuntu hosi Ensinu Portugés iha Estranjeiru (EPE) iha Namíbia ba Ajénsia Lusa.
Tuir kordenadora adjuntu, memorandu entendimentu asina ona iha fulan-Novembru 2011 entre Governu Portugal, reprezenta hosi embaixada iha Namíbia, no Governu namibianu, no permiti ona atu portugés tama iha ensinu ofisiál hanesan lian estranjeiru hosi opsaun kurikulár hahú hosi tinan daualuk eskolaridade nian.
Lian Portugeza iha Namíbia iha papel importante tanba lokalizasaun jeográfiku nasaun nian, liuliu besik ho Angola, haktuir hosi Angelina Costa.
"Iha ema adultu sira ne'ebé hakarak aprende tanba de'it kuriozidade. Ami iha mós númeru boot ida hosi médiku sira ne'ebé aprende lian portugeza tanba ema angolanu sira ne'ebé mai buka serbisu saúde iha Namíbia. Iha ligasaun tanba halo fronteira ho Angola. Ema adultu sira no hosi negósiu sira hakarak hatene lian tanba Angola", nia afirma.
Interese ne'e justifika mós, tuir kordenador adjuntu, tanba Namíbia sai hanesan membru observadór ida hosi Komunidade Nasaun sira Lian Portugeza nian (CPLP) no tanba portugés hanesan lian ofisiál ida hosi Komunidade ba Dezenvolvimentu hosi Áfrika Austral (SADC) no hosi Uniaun Afrikanu (UA), organizasaun sira ne'ebé Namíbia pertense.
Nia refere mós katak iha Namíbia, iha vertente rua hosi ensinu lian portugeza nian, ida maka ensinu ba komunidade luzodesendente sira no ida seluk iha ligasaun ba internasiolizasaun hosi lian nian, no projetu rua ne'e iha apoiu hosi Camões -- Instituto da Cooperação e da Língua.
"Kursu sira hosi EPE halo parte iha rede ofisiál hosi ensinu nian iha Namíbia. Ami iha ensinu portugés iha ensinu primáriu (iha de'it eskola balun), sekundáriu (maioria) no superiór", nia hatutan.
"Ami iha Sentru Lian Portugeza ida iha Universidade Namíbia nian ho leitór na'in rua no ho númeru médiu anuál ba alunu na'in 150. Sentru Lian Portugeza nian hanesan leitoradu boot lian sira nian hosi Universidade Namíbia", nia hatutan.
Angelina Costa hatete katak komunidade portugeza iha Namíbia hanesan ki'ik, besik ema na'in 2.000, no alunu luzodesendente sira hanesan minoria ida, "besik alunu na'in 20 to'o 30" iha universu na'in 1.800, maibé nia subliña aumentu ida hosi interese ba kursu sira lian portugeza nian hosi parte ema luzodesendente sira.
"Ami iha, maski iha ensinu portugés integradu, profesór na'in tolu ne'ebé serbisu ba Institutu Camões ne'ebé hanorin portugés, maibé ami nia rede boot, númeru boot hosi profesór sira maka ema lokál sira, ema namibianu sira ne'ebé simu ona formasaun iha lian portugeza", nia hatutan.
Angelina Costa refere katak iha totál hanesan estrutura ida ho "profesór na'in 26 (entre sira ema na'in tolu ne'ebé kontrata hosi Camões) iha eskola 22 iha rejiaun hitu iha Namíbia".
"Kordenasaun hosi ensinu, hamutuk ho embaixada Portugal, apoia projetu ne'e liuhosi formasaun ba profesór namibianu sira iha Universidade Namíbia nian no antes bolsa sira estudu nian iha Portugal no fó ba eskola sira manuál eskolar sira, nune'e mós materiál sira ne'ebé relasionadu ho ensinu lian nian", nia hatete.
"Bainhira bolseiru namibianu sira fila hosi Portugal, sira simu kontratasaun hosi Ministériu Edukasaun namibianu nian hodi hanoin portugés iha eskola ofisiál sira", nia hatutan.
Tuir responsável, iha mós kursu livre sira ba labarik no ema adultu sira, "ne'ebé ema buka barak", hanorin iha Sentru Diogo Cão, no iha protokolu sira ho entidade namibianu sira hodi hanorin lian, liuliu Ministériu Negósiu Estranjeiru sira no hosi polísia Namíbia nian", nia hatete.
Rede EPE inklui kursu sira portugés nian ne'ebé halo parte iha sistema sira ensinu lokál no mós kursu asosiativu sira / paraleu sira, ne'ebé hametin hosi Estadu portugés (liuhosi Camões - Instituto da Cooperação e da Língua), iha nasaun sira hanesan Alemaña, España, Andorra, Béljika, Holanda, Luxemburgu, Fransa, Reinu Unidu, Suisa, Áfrika-Súl, Namíbia, Suazilándia ho Zimbabué.
SAPO TL ho Lusa