Padre paroku Paroquia Santo Antonio Motael-Dili, David Alves da Conceição husu ba jovens sira labele uja telefone ou facebook nudar teknologia nia atan hodi hatodan joven nia vida.
“Mundu agora ne’e nakonu ho teknologia hanesan facebook ne’e dunik, ha’u husu ba joven sira atu labele sai atan ba teknologia hodi fo todan ba imi nia vida moris, tanba ha’u haree joven sira uza facebook hodi trata malu, tolok malu pior liu tau foto ne’ebe la serve atu publika sai,”hateten Pe. David Alves da Conceição ba JN-Diario, iha ninia knar fatin, Motael Kinta (14/01) horseik.
Amu parokia Motael ne’e hateten, TL maioria katoliku ne’e tenki hatudu espiritu moral no dignidade ne’ebe forte ho nune’e labele fo impaktu ba vida moris nudar sarani nian.
“Nudar ema katoliku tenki hatudu espiritu moral nian e nudar sarani hatene ona saida maka merese tau iha facebook ou publika sai no saida maka la merese atu tau, tanba ema hotu bele haree saida deit mak tau iha facebook, ne’e dunik tenki uja teknologia tuir nia dalan atu nune’e labele fo impaktu ba vida moris nudar feto ou mane,”dehan Pe. David.
Alende ne’e labarik sira agora pinta a’an, koir matan fulun pior liu uja telefone folin karun no didiak deit, maibe inan aman sira la hatene telefone hirak ne’e mai husi ne’ebe.
“Ho situasaun ida ne’e ha’u husu ba inan aman hodi tau atensaun ba oan sira, tanba edukasaun e moral hahu husi uma laran, labele abitua oan atu pinta a’an sedu, husik sira bo’ot ou berkembang tuir natureza no fo nafatin esperansa ba oan sira atu tara a’as dignidade nudar feto ho nune’e labele sai hanesan teknologia, osan nia atan hodi fa’an dignidade nudar feto nian, tanba akontese barak ona mane sira bosok feto liu husi sasan hodi manan feto nia isin,”tenik Pe. David. Ita
Jornal Nacional