Politika Xestu Governu Konstitusional mak poupa orsamentu, maibe funsionariu Estadu lori kareta Estadu hodi tula familia iha tempu fin de semana ba iha munisipiu.
Membru Bankada Parlamentar FRETILIN, Manuel Castro, fo sasin katak, Sabadu no Domingu kareta Estadu sira nian la’o ba mai iha munisipiu postu administrativu gasta despeza ne’ebe mak bot.
“Governu hakarak halo poupansa tenki hare didiak kareta Estadu, ita hare kareta Governu ninian la’o laiha oras, sesta, sabadu no domingu la’o pasiar hodi tula familia, hau husu Governu tenki fo atensaun,” dehan Deputadu Manuel Castro liu husi sesaun plenaria PN, Tersa (12/01/2016).
Reprezentante povu ne’e hatutan tan, kada tinan orsamentu aumenta hela deit, maibe Governu rasik la fo atensaun ba transporte ne’ebe sira uza, mina ne’ebe uza lahatene uza tuir lei dala ruma balun uza tuir sira nia hakarak.
Iha fatin hanesan Deputadu Bankada PD, Virgilio Hornai hatete mos katak, projeitu ne’ebe mak la’o balun laiha kualidade hanesa trotoal iha Kapital Dili, hadia sobu fali, balun taka hotu bee dalan atu foti ladiak, besi ne’ebe mak iha balun hela ruin deit.
“ Hau hatudu hau nia sentimentu iha ema ruma hare servisu lalos, ida nee tenki halo investigasaun liu-liu sira ne’ebe mak ezerse sira nia knar no presiza hare kontratu hodi intifika, tanba kada tinan sempre hadia trotoar iha sidade Dili,” dehan Virgilio.
Hatan ba Prekupasuan ne’e Sekretaria Estadu Asuntu Parlamentar, Maria Teresinha Viegas hatete asuntu sira ne’ebe mak deputadu sira kestiona sei hato’o ba iha ministeriu relevante hodi fo atensaun.
“Hau sei informa prekupasaun ne’ebe mak deputadu sira kestiona ba iha institusaun relevante atu nune’e bele fo atensaun,” dehan Maria.
Antes halo Plenaria deputadu husi Komisaun E Astunu Infrastrtutura hato’o sira nia relatoriu fiskalizasaun iha tinan 2015 ninian ne’ebe halo fiskaliza iha munisipiu Liquisa, DIli no Oe-cusse hodi hare projeitu infrastrutura ne’ebe la’o iha minisipiu tolu ne’e. mia
Jornal Nacional