Mane na'in hitu ataka ona iha área ne'ebé la hanesan iha sentru Jakarta nian iha loron-kinta ne'e. Laiha treinu no sira nia arma hanesan simples kontribui ona hodi oho de'it ema na'in hitu, na'in lima ne'ebé mate hanesan atakante sira.
Polísia indonéziu senti konviktu katak ema na'in hitu ne'ebé halo atake sira ne'ebé akontese iha fatin tolu ne'ebé la hanesan iha sentru Jakarta nian iha loron-kinta ne'e hakarak halo tuir atentadu sira iha Paris, maibé tanba ladún iha treinu no uza arma simples halo de'it ema na'in hitu maka mate, ema na'in lima ne'ebé mate hanesan atakante.
Reivindika ona hosi autodenominadu Estadu Islámiku (Daesh), atake sira ne'e halo mós ema na'in 24 kanek.
Bahrun Naim, militante ida ne'ebé uluk hetan prezu iha Indonézia tanba iha arma sira no agora daudaun iha Síria, karik maka halo atake sira ne'e, fó instrusaun sira ba sélula sira iha Indonézia, refere hosi investigadór sira ho baze iha intersepsaun hosi komunikasuan sira. "Nia harii sélula sira ka subsidiáriu ida hosi Daesh nian ho naran Katibah al Nusantara. Nia hanoin maka halibur apoiante sira hosi Daesh iha Sudeste Aziátiku, inklui Indonézia, Malázia ho Filipina", afirma hosi diretór polísia Jakarta nian, Tito Kamavian, ba CNN.
Autoridade sira lori oras haat nia laran hodi domina situasaun, hafoin pelumenus ema na'in tolu ho kolete armadilladu ataka kafé sira Starbucks nian iha zona ida iha sidade ne'ebé situa mós organizasaun internasionál oioin, embaixada sira no hotel sira luxu nian. Atakante na'in rua halo nakfera sira nia aan, na'in tolu mate iha tiruteiu ho autoridade sira, no na'in seluk polísia kaer moris.
Atakante na'in rua uluk hetan ona kondenasaun, na'in ida tanba frekuenta kampu ida treinu jihadista nian. Aleinde terorista sira (sira hotu ho nasionalidade indonéziu), mate mós sidadaun kanadianu na'in ida no polísia indonéziu na'in ida.
Indonézia, nasaun ho populasaun barak maka musulmanu, hetan ona entre tinan 2000 no 2009 atentadu oioin, maibé, buat hotu hatudu katak ne'e hanesan atake dahuluk sira ho ligasaun ba Daesh. Autoridade sira hanoin katak iha tinan hirak ikus ne'e ema indonéziu na'in 700 maka halo viajen to'o iha Síria ho Irake hodi hamutuk ho organizasaun jihadista ne'e.
SAPO TL ho Expresso