Xefe Estadu Maior General Falintil-Forsa Defesa Timor Leste (F-FDTL) Major Jeneral (Majen) Lere Anan Timor afirma, tinan 2016 instituisaun F-FDTL ho Polisia Nasional Timor Leste (PNTL) hametin servisu hamutuk garante estabilidade nasional ba povu no rai ida ne’e.
Major Jeneral Lere Anan Timor hato’o lia hoirak ne’e liu husi selebrasaun Natal konjunta instituisaun F-FDTL-PNTL ho tema “Natal Conjunta Hametin Espritu Nasionalismu iha Seguransa e Defesa” ne’ebe halao iha Centru Convensoens Dili (CCD) Sesta (8/01) semana kotuk.
Iha diskursu Major jeneral Lere hateten katak, selebrasaun Natal konjunta instituisaun F-FDTL ho PNTL tinan 2016 ne’e laos halibur malu deit, maibe oinsa hametin instituisaun rua ne’e.
“Natal hamutuk natal konjuntu, nia importansia laos mai halibur malu deit. Maibe nia kontiudu halo Instituisaun rua ne’e metin, konfiansa iha koperasaun iha aktividades hotu-hotu hanoin ida deit, hakarak ida deit mak estabilidade nasional,”koalia Major General Lere.
Lere hatutan katak, bainhira Instituisaun rua ne’e la metin povu mos la hakmatek, hanesan esprensia hatudu ona, krizi 2006 fahe malu povu la hakmatek balun mate balun terus.
Nune’e mos iha tinan 2015 kazu eis prezidente Cruz Vermelha, Paulino Gama “Mauk Moruk” nian instituisaun F-FDTl-PNTL ida-idak kumpri dever ninia papel servisu hamutuk objetivu ida deit, oinsa bele netraliza situasaun sira ne’ebe ke kria instabilidade ba nasaun, Estadu no Povu.
Iha oportunidade ne’e Major General Lere agradese ba eis Prezidenti Republika, Jose Ramos Horta ne’ebe sai orador iha selebrasaun refere, tanba nia (Horta-Red) deste iha tempu luta ba Independensia Timor Leste no iha tempu ukun a’an ida ne’e fo kontribuisaun makas ba instituisaun rua ne’e.
“Ema ida ne’ebe ke ami hili iha eventu ida ne’e, maun bo’ot (Horta) sai hanesan orador, ema dehan konsolidasaun, espritu nasionalitismu ba seguransa defesa liu-liu ba Instituisaun rua ne’e, ita mak toma konta ou responsabiliza area defesa e seguransa. ita ukun-an durante tinan 15 ami persija imi nafatin, hamutuk ho ami liu-liu ba jerasaun foun hamrik imi nia oin nafatin atu lori, atu dudu sira servi diak ita nia nasaun ita nia Estadu ho ita nia povu,” Lere dehan.
Iha okaziaun ne’e Lere husu ba foinsae sira ne’ebe mak iha oinstituisaun F-FDTL ho PNTL ne’e atu halao ninia papel ho diak ho reponsabilidade.
Entretantu iha fatin hanesan eis Prezidenti da Republika, Jose Ramos Horta apresia ho konvite ne’ebe mak mak dirije ba nia partisipa selebrasaun Natal konjunta F-FDTL no PNTL ne’e.
Iha oportunidade ne’e eis Prezidente bne’e husu ba instituisaun rua ne’e atu mantein disiplina iha knar tomak.
Iha seremonia ne’e, partisipa husi eis Prezidenti Jose Ramos Horta, Ministru Defesa, Ministru Interior ho ninia espoza , Xefe Estadu Maior ho ninia espoza, Vice Xefe Estadu Brigadeiru Filomeno Paixão, ofisiais superioris tantu husi F-FDTL no PNTL. Entretantu total orsamentu ba festeza natal conjunta ne’e ho orsamentu U$ 40 mil itall.
F-FDTL-PNTL laiha demokrasia
Iha oportunidade ne’e Xefe Estadu Maior General Falintil – Forsa Defesa Timor Leste (F-FDTL), Major General Lere Anan Timor afirma, knar instituisaun F-FDTL ho Polisia Nasional Timor Leste (PNTL) laiha demokrasia, tanba F-FDTL ho PNTL prontu simu konsekuensia.
“Iha tempu sedauk ukun a’an dehan ba funu laos atu oho deit inimigu, maibe prontu atu simu mate, maibe ohin loron sira debate iha Parlamentu sira koalia demokrasia. Instituisaun rua F-FDTL ho PNTL la iha demokrasia komandante dehan AA, BB, komandante desidi diak desidi át mak ne’e ona, ita militar ita laiha demokrasia,”haktuir Major General Lere Anan Timor.
Tanba nia dehan, desizaun saida deit mak komando foti sei responsabiliza.
“Sei desidi át komandante responsabiliza, ha’u nudar komandante Forsa Defesa ha’u desidi át ha’u resposabiliza, sei desidi diak ba ita hotu-hotu nia diak,”haklaken Lere. Eus
Jornal Nacional