Prezidente Repúblika timoroan nian husu fiskalizasaun preventivu konstitusionál hosi reforma aprovadu hosi parlamentu, iha fulan-Novembru tinan liubá, ne'ebé altera órgaun sira hosi administrasaun eleitorál nian, hodi hamenus númeru hosi komisáriu sira ba metade.
Taur Matan Ruak nia gabinete esplika liuhosi komunikadu ne'ebé fó sai ohin katak pedidu fiskalizasaun halo ba Tribunál Rekursu - instánsia aas liu ne'ebé ezisti iha Timor-Leste - mosu tanba "konformidade ho garantia sira independénsia no imparsialidade hosi Komisaun Nasionál ba Eleisaun sira nian (CNE)".
Kestiona mós "proposta sira alterasaun ba kompeténsia sira hosi CNE" no "kompozisaun foun no eleisaun hosi Prezidente CNE nian, ne'ebé parlamentu Nasionál hakarak aplika lalais, hodi habadak mandatu hosi membru atuál sira CNE nian".
Hanesan Lusa fó sai ona iha tempu ne'ebá, iha fulan-Novembru nia klaran, Parlamentu Nasionál timoroan nian aprova ona reforma polémiku ida iha mandatu klaran hosi membru atuál sira CNE nian no antes hosi eleisaun lokál sira no hosi prezidensiál no lejislativu sira iha tinan 2017.
Alterasaun sira, ne'ebé hamosu polémiku no debate maka'as iha plenáriu, implika, iha prátika, interupsaun ba mandatu sira hosi membru sira CNE nian ne'ebé hahú ona iha tinan 2014 no tenki hotu iha 2019.
Kompozisaun hosi CNE tuun hosi elementu na'in 15 ba elementu na'in hitu iha mandatu nia klaran.
Alterasaun sira hakarak, liuliu, koriji no muda kestaun sira ne'ebé iha relasaun ho remunerasaun no sobredimensionamentu hosi CNE, no mudansa ki'ik sira seluk iha diploma inisiál tinan 2006 nian.
Iha nia proposta inisiál, aprova iha loron 21 Abril, Governu haree katak alterasaun sira ne'e la afeta CNE atuál, hanoin liuliu ba iha tinan rua oinmai ne'ebé iha asaun eleitorál tolu.
"Membru sira hosi CNE ne'ebé hala'o daudaun sira nia funsaun iha loron publikasaun lei nian sei kontinua nafatin bainhira hahú hala'o lei ne'e", refere iha proposta hosi Governu.
Maibé, diploma ne'e muda ona iha debate espesialidade nian, iha komisaun, ne'ebé halakon prekausaun hosi Governu ba CNE atuál, hodi nune'e hahú kedas nia aplikasaun.
"Hili ona ba implementasaun lalais hosi redusaun membru sira nian no la'ós adia to'o rohan mandatu hosi membru atuál sira ne'ebé hotu de'it iha tinan 2019. Nune'e, sei halo lalais reforma institusionál ne'ebé hakarak hahú ho alterasaun sira ne'e no sei hahú hala'o objetivu hodi hamenus despeza sira, ne'ebé hanesan mós benefísiu hosi reforma ne'e", subliña hosi diploma ne'e.
Ne'e hanesan polémika boot ida iha debate, halo prezidente Parlamentu Nasionál, Vicente da Silva Guterres, aprezenta rekerimentu ida hodi loke fali debate kona-bá diploma ne'ebé mai hosi espesialidade, hodi hetan fali objetivu lejislativu hosi Governu.
Rekerimentu la liuhosi plenáriu no redasaun hosi espesialidade aprova ona, maski ho diferensa opiniaun balun iha bankada Fretilin nian, haktuir hosi partidu timoroan nian.
Governu argumenta ona katak númeru hosi membru sira CNE nian "deslokadu" hosi realidade hosi sistema eleitorál nasaun nian, "hanoin katak oportunu ba nia redusaun, ho dalan adekuadu ba nesesidade sira hosi supervizaun ba prosesu eleitorál sira no referendáriu sira ne'ebé sei hala'o".
Parlamentu mantén objetivu ne'e iha espozisaun ba motivu sira maibé fó detalle ba "insentivu finanseiru sira".
"Halakon rejimi sira ba seña prezensa nian, substitui ho kompensasaun fisku ida fulan-fulan, nune'e rezolve pontu importante ida kona-bá estatutu hosi membru sira CNE nian", haktuir hosi diploma ne'ebé aprovadu.
Konsagra mós ba períudu eleitorál sira abono ida ba "membru sira, dirijente sira no funsionáriu sira ne'ebé hala'o atividade iha ámbitu hosi órgaun sira administrasaun eleitorál nian" hodi "sujere ba sira predispozisaun ida hodi hasoru adversidade sira ho vontade maka'as".
Muda mós estrutura orgániku, harii kargu sira ba visi-prezidente no sekretáriu no buka fó "efetividade maka'as ba hodi kaer responsabilidade sira diresaun nian no orientasaun hosi CNE hodi konsagra rejimi hosi exkluzividade bainhira hala'o knaar".
SAPO TL ho Lusa