Tribunal Distrital Dili (TDD) halo julgamentu ba kazu ameasas ne’ebe mak tuir akuzasaun katak komete husi Membru Polisia Nasional Timor-Leste (PNTL) nain tolu kompostu husi Antonio Araujo ne’ebe serbisu iha Unidade Polisia Maritima (UPM), Marciana do Carmo serbisu iha Quartel Jeral PNTL no Bendito M. P da Cunha hanesan membru Unidade Especial Polisia (UEP) hasoru vitima Ana Paula ho ninia oan feto Ines Mendes.
Antes atu tama ba julgamentu tribunal koko atu halo tentative rekonsiliasaun, maibe husi parte arguido sira lakohi, tanba sira dehan katak nunka halo krime hasoru vitima sira entaun tribunal deside halo julgamentu ba oin, iha julgamentu ba maka foin hatene lolos kazu ne’e los duni no akontese ka lae.
Tuir akuzasaun Ministeriu Publiku (MP) nian ne’ebe mak le sai husi Juiza Prezidente, Jumiaty M. Freitas, katak, kazu ne’e akontese, tanba rai ne’ebe mak okupa husi vitima Ana Paula ho ninia oan Ines, iha loron 10 Agosto 2014, iha Aldeia Ai Nitas Hun, Suku Lahane Osidental, momentu ne’eba iha loron Domingo, iha ne’eba arguido nain tolu ne’ebe hanesan membru PNTL ne’e ho kondisaun lanu oitoan entaun ba iha vitima sira nia uma hodi hasai liafuan mal trata no ameasa atu tiru vitima sira bainhira la fo rai ba sira atu halo uma, ho hahalok arguido sira nian ne’e halo vitima sira trauma maka’as no tauk iha loron seluk hetan fali tanba arguido sira ne’e mesak membru PNTL deit.
Ho hahalok sira ne’e MP akuza arguido sira ne’e komete krime ameasa ne’ebe punidu iha artigo 157 numeru 1 Kodigo Penal.
Hafoin le tiha akuzasaun, tribunal konfirma fali ba arguido sira katak hakarak atu koalia kona ba akuzasaun ne’e ka lae, maibe arguido sira deklara katak sira hakarak koalia kona ba faktus ne’e, iha tribunal arguido sira nega akuzasaun MP nian.
Arguido Bendito deklara ba tribunal katak, sira ho vitima sira vizinho no antes ne’e nun ka iha problema, momentu akontese nia mos laiha fatin, tanba nia ain tuir treino Polisia nian ne’ebe moras halo nia la sai no nia iha tiha ninia tian sira nia uma hodi hare ema halo uma.
“Ami nunka ba halo problema ho sira, kona ba ameasa no hasai liafuan at ne’e mos hau nunka hatene, tanba momentu ne’aba hau iha tia sira nia uma, hau rona duni ema hakilar mais hau hanoin labarik ki’ik sira mak hakilar malu ne’ebe ami la preukupa ho ida ne’e, kona ba rai ne’e hau nia alin mak atu ba halo uma ba, rai ne’e mak vitima sira ninia kinrtal iha ba, rai ne’e mos laiha ami nian no vitima sira nian, ne’e malae nian tiha,” deklara arguido iha audensia julgamentu.
Arguido dehan tan, kona fali ba arguido nain rua seluk ne’ebe hanesan arguido ninia kuinada ho ninia alin ne ninia involvimentu ne’e nia rasik lahatene tanba sira hela uma ketak-ketak.
Iha fatin hanesan arguida Marciana ho arguido Antonio ne’ebe hanesan fen laen mos deklara katak, sira nunka ameasa vitima sira, tanba momentu ne’eba arguido Antonio hetan ordem husi ninia komando hodi kombustivel ba iha Postu UPM nian iha Municipiu Lautem-Com iha loron tuir mai mak fila fali mai Dili.
“Hau momentu ne’eba simu ordem ba portu Com, iha ne’eba mak hau nia alin sira telefone ba dehan problema, mais sira la esplika klaru, hau hakarak dehan kona ba ameasa ne’e hau nunka ameas, ami mos laiha problema ho sira antes ne’e, tanba ami serbisu hotu ne’ebe ami preukupa liu ho serbisu,” dehan Arguido Antonio.
Vitima Ana Paula konfirma ba tribunal katak, nia la hare dereita arguido sira ameasa no insulta sira, mais nia sai misa mai maka ninia bei oan sira fo hatene fali.
“Hau la hare ho matan sira ba ameasa mais hau nia bei oan sira mak hateten fali mai hau, rai ne’e ami durante ne’e mak hela hodi halo to’os ba ne’ebe sira derepente deit hodi besi mai tiding ona ba ne’ebe ami deskute malu,” dehan Vitima.
Nune’e mos vitima Ines Martins dekalara katak, momentu ne’eba nia ho ninia oan mane mak iha oin e’ebe nia hare dereitamente katak arguido Antonio mak ameasa no hasai liafuan mal trata ba sira.
“Hau hare duni katak Antonio mai ami hakilar malu no nia mak mai hamutuk ho ema sira mai hari’i besi iha ami nia to’os laran,” nia dehan.
Rona hotu tiha deklarasaun arguido sira nian, Tribunal submete kedas ba iha alegasaun, iha alegasaun ne’e, Ministeriu Publiku husu atu absolve arguido sira tanba laiha faktus ne’ebe mak forte hodi akuza arguido sira, enkuantu parte Defeza mos apoia alegasaun MP nian. kazu ne’e adia fali ba iha loron 15 agora hodi rona desizaun final.
Kazu refere prezide husi Juis singular, Jumiaty M. Freitas, MP reprezenta husi Prokurador Rogerio Vicente Viegas, arguido sira hetan asistensia legal husi Defensor Publiku (DP), Marçal Marcarinhas. mia
Jornal Nacional