Provedoria Direitus Humanus no Justisa (PDHJ) husu orsamentu adisionál 94 Mil ba Parlamentu Nasionál atu lori fila timoroan sira ne’ebé maka desteradu iha Indonézia no eis refujiadu sira tanba impaktu hosi funu ba libertasaun nasionál.
Maibé, sosiedade sivíl, akadémiku no membru Parlamentu Nasionál la konkorda ho pedidu ne’e tanba la prioridade. Prioridade liu maka oinsá rezolve problema ki’ak no problema sira seluk ne’ebé timoroan sira iha rai laran infrenta.
Ba kestaun ida ne’e, pedidu hosi PDHJ ne’e mós proridade. Prioridade la’os ba estadu tomak maibé prioridade ba PDHJ rasik tanba PDHJ hala’o kna’ar hanesan defensór ba direitus umanus. Timoroan sira iha Indonézia ne’e vítima hosi violasaun direitus umanus durante funu ba libertasaun nasionál iha Timor. Tanba ne’e, PDHJ iha dever atu reintegra hikas timoroan hirak ne’e ba sira nia família iha Timor.
Maibé, loloos, orsamentu ne’e aloka ba problema seluk ne’ebé timoroan sira infrenta iha rai laran. Ezemplu, timoroan sira balun sei moris iha ki’ak nia laran no balun mós sei moris iha lona okos. Ida ne’e maka prioridade tanba garante estabilidade no foti Timor-Leste nia oin iha mundu katak Timor livre hosi ki’ak.
Bele lori timoroan sira iha liur ne’e mai Timor maibé tenki análiza kle’an. Sé maka hatene sira fila hikas mai kria tan problema foun iha Timor. Automatikamente, sei iha problema kona-ba hela fatin no mós problema kona-ba polítika pasadu.
Tenki kuidadu mós katak timoroan sira ne’e nia estatutu ne’e sidadaun Indonézia ona. Tanba ne’e, lalika ba obriga ema atu fila mai.
Sé hakarak fila, bele fila mesak ho nonook maibé la presiza estadu hasai tan orsamentu ho valór boot hanesan ne’e atu fasilita maluk hirak ne’e fila mai Timor. Tanba, tauk iha persepsaun negativu hasoru kolokasaun orsamentu ne’e. Katak, sá importánsia hosi lori hikas timoroan sira ne’e mai Timor? (*)
Matadalan