Iha ema millaun resin nia oin ne'ebé partisipa iha misa ida ne'ebé selebra iha estádiu Barthelemy Boganda, iha Bangui, Francisco husu ona ba ema sentru-afrikanu sira hodi lori esperansa ba futuru ida dame nian.
Papa Francisco despede ona, iha loron-segunda ne'e, hosi Repúblika Sentru-Afrikanu (RCA) ho apelu ida ba diálogu no perdaun no mós ho pedidu ida ba ema kristaun sira hodi husik parte rezisténsia sira nian no lori sasin Evanjellu nian.
"[Ita tenki] harii lasu sira amizade nian, ko'alia ho ema sira ne'ebé la hanesan ho ita, perdua ba ema sira ne'ebé halo aat mai ita, kompromete hodi harii sosiedade ida ne'ebe´justu no fraternu liu, ne'ebé sei la husik ema ida", nia husu.
Francisco ko'alia iha tempu sira hosi "konflitu, ódiu no funu" ne'ebé komunidade katóliku tenki rejeita "apelu diabo nian" hodi "iha deskonfia ba aan rasik", "ba violénsia no ba hanoin destruisaun nian, ba vingansa, ba abandonu no ba explorasaun hosi ema fraku sira".
Ho ritmu knananuk no dansa tradisionál afrikanu sira nian, misa ne'e marka ona hosi mensajen "korajen" nian ne'ebé Papa hakarak husik iha nasaun ida ne'ebé marka ho funu, konflitu étniku no relijiozu sira.
"Di'ak tebes, liuliu bainhira iha tempu susar sira, bainhira la falta provasaun no sofrimentu sira, bainhira futuru hanesan laloos no ita senti kolen no ho tauk ba falla, di'ak tebes halibur malu ho Na'i, hanesan ohin ita halo, hodi moris fali iha nia prezensa", Francisco hatete no ho tulun ida hosi tradutór ida ba lian Sango, ne'ebé halo ema sira basa-liman maka'as.
Intervensaun dezafiu ona ema katóliku ida-idak hosi RCA, ne'ebé hamutuk populasaun millaun balun, hodi sai hanesan "artezaun ba renovasaun ema nian no espirituál" hosi nasaun, hodi harii "futuru foun ida". "Ema fi'ar-na'in simu Kristu nia moris rasik, hodi bele hadomi Maromak no hadomi ema sira seluk ho dalan foun ida, hodi hamosu mundu renovadu ida ba domin nian", nia hatutan.
"Ha'u hakarak agradese hamutuk ho imi ba Na'i mizerikórdia ba buat hotu ne'ebé fó ona mai imi hodi halo di'ak, jenerozu, korajozu iha imi nia família sira no iha imi nia komunidade sira, durante akontesimentu sira ne'ebé iha tinan barak akontese iha imi nia nasaun", nia hatete.
Homilia fó hanoin esforsu hosi misionáriu sira ne'ebé hala'o evanjelizasaun iha RCA no dezeja ona atu ema katóliku sira iha loron ohin nian bele loke "etapa foun ida iha istória kristaun nian" iha nasaun.
"Ita hetan bolu, ema tomak no ita ida-idak, hodi sai mensajeiru ne'ebé ita nia hosi etnia seluk, relijiaun, kultura seluk hein maibé dalabarak sira la hatene", nia hatutan.
Antes selebrasaun, Papa hasoru malu ho komunidade musulmanu, enkontru ne'ebé nia aproveita hodi afirma fali kondenasaun ba hahalok sira violénsia ne'ebé akontese hodi Maromak nia naran. Iha meskita sentrál Bangui, Francisco subliña ona katak sé maka fiar iha Maromak tenki hanesan mós ema mane ka feto ida ho dame.
Vizita pastorál dahuluk hosi Papa Francisco iha Áfrika hotu iha loron-segunda ne'e ho despedida hosi Francisco iha Repúblika Sentru-Afrikanu, hafoin liutiha hosi Kénia no Uganda. Sei to'o iha Roma iha tuku 18:45 (oras lokál).
SAPO TL ho Renascença – Foto EPA@ Daniel Dal Zennaro