Xefi Estadu Maior Jeneral das FALINTIL Forsa Defeza Timor-Leste (F-FDTL), Maijor Jeneral Lere Anan Timor, lamenta no triste tebes, tanba durante ne’e povu laiha konfiansa ba F-FDTL hodi rezolve sira nia problema.
Lere Anan Timor dehan, durante ne’e ema hotu sempre halai hotu ba Parlamentu Nasionál (PN), hodi hato’o keixa, maibé laiha ema ida atu halai ba instituisaun F-FDTL hodi hato’o ninia problema.
“Buat ki’ik ida mai husi foho ba loos iha Parlamentu, Parlamentu ne’e la’os merkadu, Parlamentu no Governu ne’e órgaun soberanu ida, ita tenki respeita, ita tenki konsidera,” afirma Lere Anan Timor ba Jornalista sira iha Palácio Prezidensial Aitarak Laran Dili, Kuarta, (04/10), hafoin sorumutu referál ho Xefi Estadu Taur Matan Ruak.
Lere hato’o lia hirak ne’e, relasiona ho relatoriu Prokuradoria dos Direitus Humanus e Justisa (PDHJ) nian kona-ba kazu violénsia i direitus humanus ne’ebé komete husi membru F-FDTL sira aas tebes.
“Ba iha Parlamentu ne’eba, kuandu ha’u laiha informasaun husi ne’e, ha’u laliga porque ne’e la’os misaun Parlamentu nian, la’os Parlamentu mak komanda forsa, nein Governu mak komanda forsa, ha’u mak komanda tanba ne’e kuandu iha problema mai de’it ha’u ka ba Xefi Estadu Maior, Vise ou ba Komandantes, komponentes ne’e mak dalan loos,” Lere Anan Timor esklarese.
Lere Anan Timur husu ba komunidade, Organizasaun Não Govermental (ONG) sira inklui mós instituisaun relevante ne’ebé toma konta ba kazu krime no violasaun direitus humanus katak, karik membru F-FDTL no Polisia Nasional Timor-Leste (PNTL) mak halo violénsia ruma, tenki hato’o keixa ba Komandante, labele hakat liu ba PN ho Governu.
“Ha’u apela ba komunidade ba ONG sira, kuandu iha problema ne’ebé que liga ba polisia, liga ba forsa defeza, di’ak liu ba hasoru nia komandante, ida ne’e mak di’ak liu, buat ki’ik bo’ot hot-hotu ba Parlamentu, ba Primeiru Ministru, demokrasia la hanorin ita hanesan ne’e, demokrasia hanesan ita dehan eskada, hirarkia, liu husi ne’ebé mak ba to’o Primeiru Ministru, liu husi ne’ebé mak ba to’o Parlamentu,” apela Lere Anan Timor.
Lere mós husu ba komunidade tomak katak, karik iha problema kona-ba soldadu sira, ou ofisiais balun ne’ebé halo problema ho joven ka ho komunidade, di’ak liu hato’o keixa direita ba nia (Lere), hodi nia foti medida hasoru soldadu refere.
“PDHJ nia iha dever, nia missaun, nia servisu, nia aponta sala sira ne’ebé que liga liu-liu ba direitus humanus, importante mak tenke iha evidensia, ita labele ko’alia de’it,”dehan Lere.
Nia fó ezemplu katak, kuandu PDHJ identifika katak, iha membru F-FDTL halo violasaun sexuál, tenki iha evidénsia, maibé kuandu evidénsia laiha mós labele.cos
Jornal Nacional