Dili, Radio Liberdade Online - Nudar Fundador UNITAL, Xefi Estadu Maior Jeneral F-FDTL , Lere Anan Timor hateten katak universidade hari’I atu eduka ema sai ema laos atu aprofeita ema kiak, ema seluk sai riku.
“Hau husu ba Dosente no Professores sira tenke halo kompremisiu ida, imi mai iha ne’e, laos tamba osan maibe imi mai atu eduka Timor oan no atu eduka ema kiak nia oan atu sai ema lolos, moris iha rai Timor ne’ebe mak ukun aan, Timor ne’ebe mak sai nasaun, sai povu iha mundo rai klaran, biar kiik, biar kasian, mais iha direitu hanesan,”dehan Lere, iha Selebrasaun Aniversariu UNITAL Ba dala XIII Iha Becora Dili, 26/10/15.
“Ami nain hira ne’ebe hari’I ne’ebe fundador ate agora, ami nein simu sentavos ida, tamba saida ? bainhira universidade hari’I ami nia palagra de orden ou ami nia konseitu mak ne’e, ita mai loke universidade atu univesidade sai fali bisnis atu sai fali riku ho kiak sira nia oan e ita lakohi aproveita sira nia terus sai riku .”
Fundador ne’e husu ba estudante UNITAL sira atu labele baruk atu aprende e tenke aprende nafatin no tenke aproveita tempu tamba futuru nasaun timor nian iha jerasaun foun sira nia liman.
iha Fatin Hanesan, Vice Ministru Edukasaun, Abel Ximenes, hatoo nia Parabens Ba Veteranus Sira neebe Hari Universidade UNITAL, “Ministeriu Edukasaun hakarak fo parabens ba Veteranus sira nebe hari fundasaun ida naran UNITAL, ami husu para ita hotu banati Tuir Veteranus sira nia exemplu, tamba sira iha tempu difisil no tempu susar fo duni sira nia Vida para Hari nasaun ida nee.”
Rádio Liberdade Dili