DILI - Komisaun Anti Korupsaun (KAK) hamutuk ho Provedoria Direitus Humanus no Justisa (PDHJ), Inspesaun Jeral Estadu (IJE) no Komisaun Funsaun Publika(KFP), kinta 22/10, asina memorandu intendementu quadrilateral ho nia objetivu atu halo kapasitasaun ba funsionariu publiku halo prevensaun no luta kontra korupsaun.
“Asina memorandu ne’e ita fokus liu ba area prevensaun tanba dala barak kazu sira ne’ebé akontese iha servisu funsaun publika no funsionariu publiku balu dala ruma sira la hatene sira nia servisu halo saida no prosesu konkursu ruma tenki tuir lei aprovizionamentu no atu prevene korupsaun tenke ho eforsu ne’ebé kolektivu,” hatete Komisariu Komisaun Anti Korupsaun Aderito Tilman ba jornalista sira iha salaun ministeriu solidariedade sosial hafoin asina mou estabelese servisu hamutuk ne’e.
Tuir nia, estabelese servisu hamutuk ne’e bazeia ba planu estratejia KAK 2012-2020 ne’ebé formaliza kooperasaun institusional ho PDHJ, IJE no KFP kona-ba prevene no kombate korrupsaun atu promove governasaun diak no proteje direitus umanus iha administrasaun públika. Nia dehan korrupsaun no mal-administrasaun nudar ameasa boot ida ne’ebé hamihis prinsipiu governasaun diak no direitus umanus, hatun valor etika no moral pesoal sira estadu nian no prejudika moris-diak povu Timor-Leste.
Objetivu kooperasaun institusional quadrilateral ne’e sei haforsa esforsu koletivu hodi prevene no kombate korrupsaun, promove governasaun diak no proteje direitus umanus iha setor públika. Finalidade husi kooperasaun quadrilateral ne’e atu minimiza pratika krime korrupsaun iha ezersisiu funsaun públika ne’ebé define iha kodigu penal artigu 292-299. Nia informa Memorandu Intendimentu quadrilateral ne’e sei funsiona iha área kooperasaun hitu (7) ne’ebé estipula iha klauzula 2.
Area balu husi hitu ne’e mak fornese formasaun profisional no kapasitasaun tekniku hodi prevene no kombate korrupsaun, promove governasaun diak, proteje direitus umanus, organiza hamutuk no partisipa iha forum, workshop, seminariu, konvensaun no konferensia sira, organiza hamutuk atividade edukativu hodi promove partisipasaun públiku, hasa’e kapasidade tékniku funsionariu publiku no ajente administrasaun publika iha area kontrolu, monitorizasaun, inspesaun no auditoria. (BT)
Business Timor