DILI - Komunidade Suku Komoro, Aldeia Golgota susar asesu ba bee mos. Komunidade iha aldeia Golgota tenke buka bee moos to’os aldeia seluk foin hetan bee moos. “Iha ami nia aldeia ida ne’e durante tinan 5 ka 6 nia laran ami seidauk hetan bee mos no loron ami tenke lao dook husi uma metru atus rua resin foin ami kuru bee, maibe dala ruma ami husu ema nia bee ema la fó tanba ema nia bee uza Sanyo (merek makina bomba bee nian uza eletrisidade),” hatete komunidade Guilhermino Guterres ba jornalista Buseniss Timor, kuarta 14/10 iha Aldeia Golgota.
Nia hatete sira preokupa tebes tanba tinan hirak ne’e nia laran sira la asesu ba bee mos maibe ema ida seidauk tau matan ba sira nia preokupasaun. “Ami preokupa tebes ho kestaun ida ne’e, tanba tinan hirak ona ami laiha bee mos atu hodi han hemu, haris no fase roupa. Iha ne’e ami fura bee maibe bee merak no mer.
Banhira ami uza hodi tein etu sai mean hotu, ami halerik tinan barak ona maibe laiha ema ida atu rona ami nia halerik. Ohin media bele mai foti informasaun ida ne’ebé ami husu atu hato’o informasaun ne’e para boot sira bele hatene kona-ba ami nia problema ida ne’e,” nia hatete. Nia mos husu ba ministeriu obras publika transporte ni komunikasaun,liu husi diresaun nasional servisu bee nian atu tau netik atensaun ba kestaun ida ne’e.
“Ami husu ba ministeriu relevante atu tau matan netik ba ami nia problema ida ne’e tanba tinan barak ona ami moris iha rai maran hanesan ne’e no tinan-tinan governu aloka orsamentu boot maibe problema ki’ik hanesan ne’e mos seidauk bele responde ne’e to’o bainhira los mak bele rezolve tanba ami povu kiik terus liu tiha ona ami hakarak moris ho buat ne’ebé diak,”nia sujere. Alende ne’e xefi suku Comoro Eurico Soares, hatete problema bee mos hato’o ona ba ministeriu kompetente.
“Problema ida ne’e dala barak ona komunidade hato’o mai ami no hau rasik ba hasoru malu ona no tanke sira halo tiha ona iha foho leten, maibe to’o agora bee seidauk tama la hatene bainhira mak bele fornese bee moos ba komunidade hirak ne’e tanba tinan barak ona sira la asesu ba bee moos,” dehan xefi suku ne’e. Lideransa komunitaria ne’e mos hatete nia sei esforsu nafatin atu bele responde lalais problema refere tanba fo impaktu boot ba komunidade nia nesesidade lor-loron.
“Hau sei esforsu nafatin hodi hato’o kestaun ne’e ba ministeriu relevante atu bele aselera lalais problema ne’e tanba problema bee mos ne’e sai problema boot ba komunidade sira ne’ebé hela iha Aldeia Golgota no difikulta sira nia nesesidade lorloron,tanba kuandu bee laiha ita labele halo buat ida,”promete xefi suku ne’e. (BT)
Business Timor