KUPANG - Droga oras ne’e sai ameasa ba sosiadade Timor-Leste (TL) ho Indonézia liu-hosi fronteira Mota-ain ho Atambua.
Reprejentante Parlamentu Nasionál Komisaun F ne’ebé mak trata asuntu saúde no sosiais, deputadu Eládio Faculto dehan, droga sai amesa ba nasaun rua. Tanba ne’e, presiza atu kombate li-liu area fronteira entre TL ho Indonézia.
“Ita iha Timor ne’e problema ida mak ita nia lei kona-ba droga seidauk iha hodi fó kompetensia ba instituisaun seguransa no instituisaun relevante seluk, atu kazu ne’ebé mak iha ligasaun ho droga. Maibé, oras ne’e ita uza hela lei Indonezía numeiru 22/2007 nian”, Eládio ba Timor Post iha Kupang, Sábadu, (17/10).
Fila ba Timor, Faculto hatutan, sei lori pedidu ne’ebé mak hamosu iha diskusaun kona-ba droga nian iha Kupang ne’e ba governu atu haree kona-ba oinsá fó apoia finanseira ba parte polísia, migrasaun no alfândega sira iha aeroportu.
“Ita mós presiza sosa material sira ne’ebé mak bele detekta droga ne’e tau iha aeroportu no fronteira, nune’e bele detekta sirkulasaun droga tama sai ita nia nasaun”, Eládio katak.
Iha fatin hanesan Xefi Badan Nasional Narkotik (BNN) Provinsia Kupang, Sulistiandri Atmoko dehan, area fronteira oras ne’e sai ona lampu mean ba sirkulasaun droga, tanba ne’e presiza fó atensaun masimu hosi nasaun rua ne’e nian.
“Ita nia fronteira oras ne’e sai ona area sirkulasaun droga nian, ne’e perigu ita tenki kombate hamutuk”, Sulistiandri katak.
Nune’e mos, aprejentasaun Servisu Investigasaun Kriminál Nasionál (SIKN) ne’ebé mak lori hosi Ajente Prinsipal Gastaõ Soares dehan, osan ho droga sempre kait ba malu.
“Ita ko’alia kona-ba droga ne’e ita mós tenki ko’alia ona kona-ba osan. Tanba emabandar narkotiksira ne’e la’os ema bai-bain”, tenik nia.
Tuir nia, padraun droga sira bele sosa buat hotu. Atu kombate droga, governu presiza fakar osan ne’ebé mak bo’ot.
Nia hatutan, ema sé de’it mak servisu iha kualker instituisaun ruma ho salariu ki’ik, bainhira ema osan bo’ot hanesanbandardroga nian mai fó osan bo’ot, automatikamente nia simu ona. Tanba ne’e, husu ba governu sé bele haree ba kestaun ne’e nune’e bele kombate duni droga ne’e iha TL.
Iha fatin hanesan alfândega aeroportu internasionál Nicolao Lobato, Alberto Seixas dehan, dialogu internasionál ne’ebé mak ko’alia kona-ba prenvensaun droga entre nasaun rua Indonezía ho TL ne’ebé mak hamosu ona akordu ida iha liña fronteira Batugade nian hodi hametin servisu parte kompetente sira iha nasaun rua ne’e nian hodi servisu maka’as prevene no kombate trafiku droga ne’ebé mak durante ne’e tama sai iha fronteira tasi, lalehan no rai maran.
“Ha’u hato’o ona ba BNN no dirijente narkoba Kupang atu fahe esperensia ba servisu instituisaun kompetenti sira ne’ebé iha fronteira, liu-liu alfândega hodi kontrola sasan ne’ebé mak tama no sai liu-hosi portu, aeroportu no mós fronteira rai maran nian”, Alberto dehan.
Nia hatutan, sira parte BNN ho polísia la-servisu mesak, tenki iha komunikasaun ba malu hodi bele atua hamutuk ba modus operandu mafia internasionais ne’ebé infiltra iha aimoruk a’at ou droga, interese iha vizaun no objetivu ida de’it atu hametin lutu nasaun nian.
“BNN hatete mai ha’u katak, sira prontu atu ajuda ami alfândega TL karik diretór jeneral alfândega TL hato’o pedidu liu-hosi BNN Kupang hodi hato’o ba diretór jeneral alfândega Indonezía nian atu bele kapasita rekursu humanus ba detektasaun drogas”, Alberto katak tan.
Dialogu ne’e partisipa hosi delegasaun TL nian mak SIKN, alfândega, Fundasaun de La Amor (FDA), no parte Indonezía hosi Dirjen BNN, Sosial, Piskolog Yohanes Tamaluk, no konvidadus sira seluk eventu ne’e organiza hosi Yayasan Warna Kasik (YAWAKA). (way)
Timor Post