DILI - Funsionáriu Tékniku Professionál ho inisiál DS ne’ebé servisu iha Diresaun Nasionál Rejistu no Notariadu (DNRN), Ministériu Justisa (MJ) deskute malu ho Primeiru Ministru, Rui Maria de Araújo, bainhira xefe governu ne’e hala’o inspeksaun urjente ba fatin ne’eba.
Iha loron Segunda (19/10), Primeiru Ministru, Rui Maria de Araújo sai hosi Palasiu Governu iha tuku 09.00 otl, no to’o iha DNRN tuku 09.04 dader otl.
Tuir observasaun Timor Post, to’o iha edifísiu DNRN nian, Primeiru Ministru ne’ebé maka akompaña hosi Inspetór Jerál Estadu (IJE), Fransisco de Carvalho vizita uluk ba iha fatin rejistu passaporte nian hodi komprimenta funsionáriu no sidadaun sira ne’ebé maka ba trata passaporte.
Hafoin ida ne’e, Primeiru Ministru kontinua hakat ba andar leten hodi hasoru malu ho Diretora Diresaun Nasionál Rejistu Notariadu, Maria do Rosario Fátima Castro hodi ko’alia kona-ba progresu servisu iha DNRN nian.
Remata tiha sorumutu ho Diretora DNRN, Xefe Governu ne’e kontinua halo observasaun ba iha Departamentu Rejistu Públiku, no iha fatin ne’eba, Madre na’in ida tu’ur hein hela funsionáriu sira atu trata dokumentu assosiasaun nian.
Nune’e iha tuku 09.09 dader otl, Ministru Justisa (MJ) Ivo Valente mós to’o iha sala Departamentu Rejistu Públiku nian hamutuk ho asessóra internasionál na’in ida (1).
Iha dada lia ho Primeiru Ministru, Madre ne’e hahú esplika ona kriteriu ne’ebé maka iha hodi halo tratamentu ba dokumentus assosiasaun nian.
Madre ne’ebé maka ko’alia uza lingua Indonezia nian ne’e haktuir, nia mai iha DNRN atu trata dokumentus assosiasaun nian ne’e hamutuk dala hitu (7) ona, maibé seidauk iha rezultadu tanba hosi parte DNRN hatete, dokumentus hosi Madre nian seidauk prienxe kriteriu ne’ebé maka DNRN fó.
No iha biban ne’e, Primeiru Ministru detekta ona failansu hosi Departamentu Rejistu Públiku nian tanba fó kriteriu ba Madre sira atu halo rejistu ba assosiasaun, diferente ho kriteriu orijin ne’ebé maka iha.
Bainhira Ministru Justisa no Diretora DNRN tenta esplika hela ba Primeiru Ministru, mosu hosi kotuk mai Funsionáriu Departamentu Rejistu Públiku nian ho inisiál DS esplika ba Xefe Governu katak, kriteriu sira ne’e sala no komplikadu, tanba ne’e presiza halo muda lei (laesplika lei númeru hira).
Tanba iha inisiu Primeiru Ministru detekta ona kriteriu balun atu rejistu assosiasaun ne’e sala, no funsionáriu ne’e lapreokupa ho Ministru Justisa no Diretora DNRN ne’ebé hamri’ik hamutuk ho Xefe Governu, no kontinua deskute malu ho Primeiru Ministru.
Sente katak funsionáriu ne’ebé servisu iha Ministériu Justisa hahú hosi tinan 2000 to’o ohin loron ne’e ko’alia ho lianguazen ne’ebé maka’as, Primeiru Ministru husu direita kedas ba iha Ministru Ivo Valente no Diretora Maria do Rosario Fátima Castro atu halo avaliasaun ba funsionáriu ne’e.
“Señor Ministru no Diretora, halo favor halo avaliasaun ba funsionáriu ne’e,” dehan Primeiru Ministru VI Governu Konstitusionál ne’e.
Konsidera orientasaun hosi Primeiru Ministru, iha momentu ne’e kedas Ministru Justisa, Ivo Valente husu funsionáriu ne’e hodi nonok no labele ko’alia hasoru Primeiru Ministru.
Haree ba linguazem hosi funsionáriu Departamentu Rejistu Públiku ne’ebé ladun di’ak hasoru Primeiru Ministru, Diretora DNRN Maria do Rosario Fátima Castro hatete, sei halo avaliasaun ba funsionáriu refere.
“Ida ne’e mós fó atensaun ba Funsionáriu Públiku hotu, dalaruma karakter orijin Timor nian maka sempre sai problema, nia linguazen ko’alia maka ladun tau em ordem. Maibé ita tenkeser fó avaliasaun duni tanba atu ko’alia ba lideransa ida tenke sukat no responde ho di’ak,” afirma Diretora Maria.
Hadi’a Manual Servisu
Iha oportunidade ne’e mós, Primeiru Ministru halo inspesaun ba iha Departamentu Arquivo Centrais, Departamentu Administrasaun, Cartorio Notarial Dili no departamentu seluk tan iha DNRN.
Remata tiha inspesaun, Primeiru Minstru hatete, DNRN hanesan fatin atendementu públiku, hahú hosi legaliza dokumentu, trata Billete Identidade, rejistu ba organizasaun no assosiasaun, rejistu nasionálidade.
Tanba ne’e, Primeiru Ministru dehan, inspesaun urjente ba iha DNRN ne’e atu haree besik liutan funsionamentu servisu nian, no iha inspesaun ne’e Xefe governu nota katak servisu balun la’o di’ak no balun presiza hadi’a.
“Ita haree rasik ona katak, iha prosedementu balun ne’ebé lolos ne’e lapresiza halo todan demais, ezemplu Madre ida mai atu rejista nia Kongregasaun, Madre rasik hatete dehan nia ba mai dala 7 ona, no depois haree fali dokumentus sira ne’e ho detailus, Ministru no Diretora sira haree dehan iha failansu ida iha kriterius ne’ebé ita ezijé para madre sira halo,”haktuir Primeiru Ministru, Rui Maria de Araújo.
Ho kestaun hirak ne’e, Xefe Governu dehan, presiza atu haree no iha disponibilidade tomak hosi DNRN para atu melhora servisu ne’ebé iha.
“Ezemplu konkreta maka ema ne’ebé atu trata passaporte presiza selu no bainhira sira trata ona asuntu administrativu iha DNRN, sira presiza halai ba to’o iha banku atu selu,”katak PM Rui.
Tanba ne’e, Ministériu Justisa bele haree posibilidade oinsá konvida banku mai loke sira nia fatin ida iha DNRN hodi bele fasilita servisu sira ne’e ho di’ak liutan.
PM Rui realsa, Banku Nasionál Comersiu Timor-Leste (BNCTL) iha interesante atu harii fatin ida iha DNRN. Maibé, BCNTL hakarak la’ós atu selu passaporte de’it, maibé atu halo mós aktividades bankaria sira seluk.
Tuir Diretora DNRN, Maria do Rosario Fátima Castro rekoñese katak, iha parte Departamentu Rejistu Públiku nian iha buat balun maka iha mudansa no mekanismu ne’ebé fasilita haree katak, manual servisu balun fraku no sei lalos.
“Entaun ida ne’e sujere no rekomenda atu diresaun ne’e atu bele haree para oinsá hadi’a di’ak liutan kona-bacek list, liliu kona-ba assosiasaun no fundasaun sira ne’ebé atu halo sira nia estatuto, maibécek listbalun ne’e ita latau manuel em ordem, entaun ida ne’e iha duni failansu no rekomenda atu hadi’a ,”Diretora Maria promete.(tay)
Timor Post