Pe. Germano Gusmão – Matadalan, opiniaun
Iha jornal nacional sira iha semana hirak liu ba, ita nia matenek no político na’in balu insiste maka’as los, atu loke fatin prostituisaun iha Timor-Leste hodi evita moras HIV/SIDA iha Timor-Leste. Ema ne’ebé hanoin insiste maka’as los atu loke fatin prostituisaun ne’e, ema ne’e Timor oan tebes ka ou ema ne’e keta descendente hosi rai seluk kariak.
Cultura no trdição povo Timor desde uluk, povo Timor iha fatin ne’ebé mak loke fatin prostituisaun iha sira nia moris fatin? Iha português nia tempo keta fatin harí prostituisaun iha karik, ita la dun rona. Iha fali Indonesia nia tempo, ema feto Indonesia barak mak mai halo fatin prostituisaun iha Timor, li-liu iha cidade Dili laran. Ne’e cultura aat ema Indonesia nian. ita Timor desde beilara sira nia tempo, biar ema matenek sira dehan, povo primitivo, maibe sei ha sensibilidade moral; sira la iha tradição eh cultura harí fatin prostituisaun iha sira nia hela fatin, sa tan loke fatin prostituisaun ba sira nia oan no bei oan sira.
1. HARÍ FATIN PROSTITUISAUN NE’E TRADIÇÃO CULTURA POVO TIMOR IDA NE’EBÉ NIAN?
Político na’in sira ne’ebé halon an manu-aman los, lor-loron kokorek atu harí fatin prostituisaun, hatan to’ok ba: Harí fatin prostituisaun ne’e povo Timor nia cultura duni ka la’e? Povo Timor ne’e iha lian no cultrua oin-oin; povo Timor ida ne’ebé mak harí fatin prostituisaun halo parte iha sira nia cultura ou tradição prostituta? Povo Timor ida ne’ebé mak harí fatin prostituisaun ba sira nia oan no ba sira nia beioan sira rasik iha Timor?
Povo Makassa’e sira iha tradição prostituta? Povo Fataluku sira iha tradição prostituta? Povo Waimu’a sira iha tradição prostituta? Povo Mambae sira iha tradição prostituta? Povo Galolen sira iha tradição prostituta? Povo Idate sira iha tradição prostituta? Povo Tetum Terik sira iha tradição prostituta? Povo Atoni sira iha Oe-cussi iha tradição prostituta? Povo Kemak ho Bunak sira iha tradição prostituta? Povo Tokodede sira iha tradição prostituta? Se povo ida iha Timro-leste la iha tradição prostituta; ema timor oan ne’ebé halo programa loke fatin prostituisaun iha timor-leste ne’e mak traidór ba nação no ba povo timor – Leste.
3. TIMOR-LESTE NIA LUTA, LUTA BA SAI NAÇÃO PROSTITUTA?
Husu to’o ba ita nia fundador sira nação Timor nian; sira uluk luta atu harí nação ida naran Repúplica Democrática Timor Leste, sira hanoin atu harí fatin prostituta ba Timor oan sira iha Timor-Leste independente? Husu to’o ba antigo combatentes no veteran sira funu nian: sira durante tinan barak halo funu, sacrifica sira nia an, sacrifice sira nia família uma laran, sacrifica sira nia riku-soin hotu tan de’it atu bele alcansa Indepenência ba Timor-Leste; sira hakarak duni Timor-Leste ne’e bele hetan fatin hodi harí prostituisaun?
Se fundador sira nação RDTL no antigo combatentes no veteran sira, la hanoin no la luta atu cira fatin prostituisaun iha Timor – Leste; ema Timor oan ne’ebé halo programa loke fatin prostituisaun iha Timor – Leste ne’e mak traidór ba fundador sira nia luta. Nia traidór ba antigo combatente no veterano sira nia luta ba Timor-Leste Independência. Saudoso sira ne’ebé mate barak ba rai Timor – Leste, barak sira nia ruin sei namkari hela iha ai-laran fuik, barak mos sira nia ruin la hetan ona; sira mate ba saida los? Político na’in sira ne’ebé halon an manu-aman los, lor-loron kokorek atu harí fatin prostituisaun, hatan to’o ba!
4. RELIGIÃO FALSO NINIA LIDER SIRA SAI FALI PROMOTORES DE PROSTITUISAUN IHA TIMOR LESTE
Iha tempo Indonesia grupo artista sira hodi sira nia cântico ida ho título “ Ai….ohin loron naran-naran de’it, óclu metan loron nian bela taka ba kalan”. Ema religioso katak ema sira ne’ebé tuir vocação Maromak nian; sira nia moris no sira nia knaar principal mak atu hanorin ema hatene Maromak, hanorin ema hadomi Maromak liu hosi catequese, celebração liturgia, halo serviço de caridade, etc. Atu sai ema religioso, sira hetan formação especial kona ba vocação nuudar religioso. Hatais roupa religioso nian. Sira nia serviço concentra liu iha Uma Kreda. Maibe ohin loron ema religioso balu halo nar-naran de’it. Sira sai fali promotor hodi halo produção promoção kondom ba povo. Promotor ba promoção localização de prostituisaun iha Timor – Leste. Sira sai fali péritos kona ba moras HIV/SIDA.
4. EMA RELIGIOSO FALSO SIRA NE’EBÉ LA IHA SERVIÇO RELIGIÃO NIAN MAK BA HALO FALI PESSOAL SAÚDA NIA SERVIÇO.
Ita nia governo desde primeiro governo constitucional, prepara ita nia jovem barak ba estuda koba ba mediucina iha rai Cuba no mos iha Indonesia. Oras ne’e, ita nia medico no pessoal saúde sira barak ona mak mai halo serviço iha território tomak, até to’o ona iha suco sira aldeia sira iha Timor laran. Ema medico sira mak estuda koba ba moras no ai-moruk oin sa mak bele kura moras sira. Tanba sa mak ema religioso sira ba ocupa fali ema medico sira nia knaar? Ema medico mak estuda kona ba saida mak moras contagiosa sira hanesan virus HIV/SIDA, maibe sira la halo serviço ida ne’e; enquanto ema religioso mak ba fali sai promotor ba promoção kondom, promoção sexo saudavel; halo ninia uma kreda la’os fatin atu haklaken Maromak nia Liafuan, maibe sai fali promoção sexo saudavel. Igreja sai fatin promoção kondom.
Igreja condomização! Igreja sexualização, em vez halo uma kreda sai fatin evangelização, sai fali fatin kondomização. Em vez de halo uma kreda sai fatin hanorin catequese, sai fali fatin sexualização. Ema relgioso, em vez de sai profeta evangelizadora, sai fali profeta kondom, sai profeta sexualizadora.
5. PROSTITUISAUN MAK PRIORIDADE BA DESENVOLVIMENTO NACIONAL?
Iha Timor laran tomak, li-liu ami sira be moria iha foho, kuran ba necessidades básicas, hanesan: falta be mos, saúde, estrada hodi acesso ba mercado, condição escola barak sei sabraut hela. Maibe povo nia represenstate balu ko’alia maka’as kona ba oin sa atu harí ona fatin ba prostituisaun iha Timor – Leste. Político na’in sira ne’ebé “sarani” sira nia an “representante do povo” iha ne’ebé los? Povo moris falta ba be mos la’os prioridade ba povo? Povo moris la’o iha estrada aat la’os prioridade ba povo? Povo moris falta ba centro saúde ne’ebé di’ak, la iha condição di’ak ba tratamento saúde povo nian la’os prioridade? Povo nia oan sira estuda iha escola aat la’os dificulta povo nia oan sira ne’e hodi estuda, la’os prioridade? Povo ki’ak até balu ne’ebé hela keadas iha político no matenek na’in sira nia baranda okos iha Dili laran, ne’e la’os prioridade? Programa desenvolvimento nacional atu combata povo hamlaha.
Iha cidade Dili rasik sei iha ema ne’ebé loron ida han dala ida de’it. Campanha político barato sira ne’ebé dehan povo tem que han loron ida dala 3, iha ne’ebé los? Ita nia jovem barak la iha fatin ba serviço ne’e la’os prioridade? Los duni, ema político na’in sira manan osan barak ona, goza di’ak liu ona. Sira nia familia no sira nia oan em geralmente ba escola hotu iha escola privado sira ne’ebé qualidade di’ak maibe karun los, tan sira bele selu. Habosok hela povo ki’ak nia oan sira iha escola pública ne’ebé barak mak la iha condição.
Iha futuro ema boot sira nia oan sira continua sai matenek, ema ki’ak no aileba sira nia oan sai ki’ak no aileba nafatin. Tanba ema boot no riku sira hakarak duni goza sira nia vida, buka gosto precisa duni loke fatin prostituisaun ba sira. Tanba, se mak sei ba fatin prostituisaun ema sira ne’ebé iha osan!
Tan ne’e, político na’in sira ne’ebé hanaran an povo nia ulun hodi hanoin, povo nia matan hodi haré, povo nia ibun hodi ko’alia; afinal político camoflace de’it iha tempo campanha. Kari rai rahun ba povo eleitor sira nia matan; ami quando manan sei halo ida ne’e ba imi ou ida neba ba imi. Quando hetan tiha ona cargo iha estado, haluha ona povo vontante sira. Povo sai sira nia kareta hodi sa’e ba buka kadeira. Quando hetan tiha ona kadeira haluha tiha ona povo. Político maukose! Maubobar, manipula povo!
NB: Artigo ida ne’e la representa instituição Igreja ou Diocese Baucau nian. Maibe ne’e idéia pessoal hosi Padre Germano Gusmão, Diocesano. Hakerek na’in: Padre Germano Gusmão, hosi Diocese Baucau, hela iha Diocese Baucau.