Estranjeiru barak nebe kondenadu ba kastigu mate iha Indonézia laiha asesu ba sira nia direitu fundamentál sira no balun ema baku hodi obriga halo konfisaun, hatete hosi relatóriu ida hosi Amnistia Internasionál (AI) nebe fó sai iha loron-kinta ne'e.
Iha estudu, organizasaun defeza ba direitu ema sira nian hatete katak rekuza tiha ona asisténsia jurídiku no asesu ba intérprete sira ba ema kondenadu sira nune'e mós sira tenki asina dokumentu jurídiku sira iha lian nebe kondenadu sira la hatene.
Relatóriu ho títulu “Flawed Justice" refere kazu oioin nebe hatudu violasaun ba direitu sira hosi ema prezu sira, destaka ema estranjeiru sira, barak liu hein hela ezekusaun.
Ema prezu na'in 120 resin hein daudaun kastigu mate nian iha Indonézia, nebe pelumenus ema na'in 35 hanesan estranjeiru, haktuir hosi AI.
Na'in 12 hosi na'in 14 fuziladu sira iha tinan ne'e hanesan ema estranjeiru no inklui sidadaun na'in rua hosi Brazil, Austrália ho Holanda, no sira hotu hetan kondenasaun ba mate tanba krimi sira relasionadu ho droga.
"Ami deskobre problema todan no endémiku sira iha sistema judisiáriu indonéziu", hatete hosi diretór-adjuntu hosi kampaña sira Amnistia nian, Josef Benedict, ba imprensa.
Ministériu Justisa indonéziu nian lakohi halo komentáriu ruma, bainhira porta-vós hosi Negósiu Estranjeiru sira, Arrmanatha Nasir, hatete ba ajénsia France Presse katak "respeita direitu hosi prizioneiru sira tuir lei sira nebe hala'o daudaun".
Tuir AI, Indonézia ezekuta ona ema na'in 19 hahú tinan 2013, tinan nebe hahú fali ezekusaun sira hafoin interupsaun durante tinan hitu nia laran.
SAPO TL ho Lusa