Eis Primeiru Ministru, atual Ministru Planeamentu Investimentu Estratéjiku (MPIE), Kay Rala Xanana Gusmao hatete nia prontu ba hatan iha Tribunal Distrital Dili (TDD) kona ba kazu eis Ministra Finansas, arguida Emilia Pires ho arguida eis Vise Ministra Saude, Madalena Hanjam ne’ebé deskonfia komete korupsaun.
Liu husi audensia julgamentu, Tersa (13/10), iha TDD Mandarin, antes julgamentu tribunal deklara katak, “sasin Kay Rala Xanana Gusmão ne’ebe maka parte defeza arola, depois tribunal notifika hetan resposta diak tanba sasin ne’e prontu atu fo nia deklarasaun iha julgamentu ne’e. So sasin deputada Fernanda Lay ne’ebe mak defesa arola, no tribunal notifika ona maibe seidauk iha resposta to’o ohin loron,” dehan juis Prezidenti José Maria de Araújo iha sala audensia.
Iha julgamentu nee, TDD kontinua rona sasin sira ne’ebe tama ona iha akuzasaun hanesan sasin Leão Borges, Diretor Nasional Administrasaun Logistika no Aprovizionamentu Ministeriu Saude nian.
Liga ba kazu ne’ebe deskonfia komete husi eis Vise Ministra Saude, Madalena Hanjam ho Emilia Pires kona ba sosa kama ba Hospital Nacional Guido Valedares (HNGV) iha tinan 2011 ho 2012 ne’e, sasin ne’e deklara ba tribunal katak, nia parte ladun iha koñesementu kona ba projetu iha 2011 nian, nia so simu deit despaisu husi arguida Madalena hodi sosa kama ba hospital tanba kondisaun iha momentu ne’eba ladiak.
Sasin Leão Borges hatutan, kona ba iha tinan 2012 nian ne’e, iha loron 3 fulan Fevereiru 2012 arguida Madalena halo proposta ba iha Ministra Finansa hodi sosa kama ba hospital referal no sentru saude sira. Entaun iha momentu ne’eba aneksu mos iha lista sasan nian ne’ebe halo husi diresaun ne’e, tanba hetan autorizasaun husi arguida Madalena.
Iha momentu ne’eba sasin Leão Borges ne’e alende hanesan Diretor Aprovizionamentu Administrasaun no Logistika nian, nia tama mos iha ekipa Komisaun Aprovizionamentu Minsteriu Saude (KAMS) nian, maibe kona ba projetu ne’e la liu husi KAMS tanba laiha reuniaun nivel diretores ho KAMS ba proposta ne’e, maibe direta husi arguida Madalena Hanjam.
Tuir sasin Leão Borges katak, tuir prosesu normal buat hotu-hotu tenki liu husi aprovizonamentu maibe ba projetu sosa kama ne’e ne’e la liu husi KAMS ida.
Kona ba justifikasaun ne’ebe mak tau iha projetu emerjensia ne’e, nia parte hetan despaisu husi Arguida Madalena maibe nia la hala’o tuir prosesu ne’ebe iha tanba deit la kompriende ho lingua Portugues ne’ebe hakerek iha karta ne’e. Tanba ne’e despaisu ne’e nia haruka deit ba iha diresaun Emilia Mendonca nian. Maibe iha prosesu ne’e la liu husi aprovizionamentu nian.
Ba asina kontratu ne’e nia hetan liu husi ofisial Agapito da Silva ne’ebe dehan ba nia katak arguida Madalena ho kompañia ne’e la asina hamutuk iha TL maibe arguida Madalena asina no haruka ba kompañia ne’e asina liu husi fax email ba Australia no asina mos liu husi fax email deit. Maibe kona ba semak asina uluk no ikus nia parte la hatene.
Audensia ne’e prezide husi juis kolektivu, juiz José Maria de Araújo, Francisca Cabral no Maria Solana Fernandes; Ministeriu Publiku mak prokuradora Angelina Saldanha, Lidia Soares ho Jacinto Babo no arguida Madalena Hanjam hetan asistensia legal husi advogadu privadu nasional José Guterres, advogadu internasional Nuno Morais Sarmos no Rui Costa Ferreira.
Entertantu arguida Emilia Pires hetan asistensia legal husi advogadu privadu internasional Frederico Bettencourt Ferreira ho Carolina Mouraz, advogadu nasional José Pedro Camões.Des
Jornal Nacional