Kond isaun Estrada Munisipiu Ermera, Postu Administrativu Gleno ba to’o iha Postu Admnistrativu Hatulia grave tebes, tanba ne’e maka Xefi Suku Poetete, Postu Hatulia, Felisberto das Neves husu ba Governu liu husi Ministeriu Obras Publiko Transporte no Comunições (MOPTT) atu tau matan netik.
“Hau nudar povu nia liman ain hakarak husu ba Ministru katak estrada husi Tibar mai Gleno los ona, ne’ebe se Ministru mai husi Ermera karik foti netik matan ba ami dalan, Gleno mai Ermera ba Fatubesi, ba Hatulia no mos Gleno ba Atcabe nia kondisaun at teb-tebes, iha Ermera vila ita bot nia moris fatin sabraut tebes, rai halai tun sa’e, rai rahun suar hanesan ahi suar tanba ne’e maka ami hakruk hodi husu ba Ministru atu tau matan netik ba ami nia estrada ne’e,” hateten Xefi Suku Poetete, Felisberto das Neves, bainhira partisipa iha seremonia lansamentu primeira pedra ba Eskola Sekundaria Helio Pina iha Suku Poetete, Sesta (26/06/2015).
Xefi Suku ne’e realsa tan, durante ne’e sira hatama ona proposta, maibe to’o oras ne’e seidauk hetan rezultado, tanba orsamentu la to’o.
“Ami lakleur tan mos simu ilas inan feto virgem peregrina husi Dili mai to’o Fatubesi ne’ebe ho haraik an ami husu Ministru apoiu netik emergensia ruma ba, tanba ami estrada nia kondisaun at teb-tebes buat hot mai bele halo mais kona ba estrada ami sei nafatin tane liman ba Estado,” Felisberto informa.
Ministru Obras Publiku, Transporte no Comunicações (MOPTC), Gastão des Sousa, lia tun dehan, nia sei rejistu hotu preokupasaun sira ne’e, maibe nia lakohi atu promete se lae sisi hela deit.
“Kona ba pedidu sira ne’ebe mak xefi suku hato’o konserteza hau sei konsidera nafatin, mais hau lakohi promete se lae kuandu promete ne’e sei sisi tuir nafatin, maibe se implementa duni husu ba Ermera oan sira tenke implementa ho didiak no responsabilidade, tanba ikus mai mak diak Ermera oan duni mak sei utiliza,” dehan membru Governante ne’e.
Estrada diresaun Tibar-Gleno komesa diak ona, maske seidauk bele tau hotu alkatraun, maibe husi parte Gleno ba to’o iha Hatulia kondisaun grave tebes, ho kondisaun estrada ladiak inpaktu ba transporte publiku atu asesu to’o iha Hatulia hodi sosa priduto lokal sira ne’be mak komunidade iha. mia
Jornal Nacional